[المتقصي]

سويت لي من زايـد الهـم طـاروق=فيـه العنـا فيـه الألـم و التعاسـه
من هاجس سبب على صدري حروق=باسباب قـوم همهـم فـي البلاسـه
يا عين هلي و استهلي مـن المـوق=دمـع كمـا ميـاح زمـزم مقاسـه
على زمان حـط فـي قلبـي فتـوق=سبب علـى قلـب المعنّـى تعاسـه
هنيـت زول سهمتـه يتبـع النـوق=و لا عرف درب الحضاره و ساسـه
يمشي على خد زمت كـل زملـوق=ما مرها غيـر الثعـل و العساسـه
نباتها ربلـه و عرفـج و رقـروق=و سـدر ظلالـه مدهـل للونـاسـه
يسرح وشمسه توها حـزة شـروق=و اللي معه تمره و قربـه و طاسـه
و لا شال هم ملاعبة كـل معشـوق=و درب الهوى و الغي ما شرب كاسه
و لا شال هم اللي تبي دخلة السـوق=فستانهـا تـبـي تغـيـر مقـاسـه
ولا شال هم أحمد و حصه و فاروق=اللي ابتدا شيـل الكتـب و الدراسـه
همّه يخايل كل مـا لاحـت بـروق=عل الحيا يـروي وطـاه و يباسـه
يسرح و يقطع لى مشى خمسة عروق=سـود الليالـي زودت قـو بـاسـه
أنا من الأيـام فـي كبـدي حـروق=و الجفن عمره مهتنـا فـي نعاسـه
باسباب غرو زايد الحسن و الـذّوق=ما ينقصه غير الخـدم و الحراسـه
العمر وقـف بينـي و بينهـا عـوق=زود على ربـع الحسـد و النجاسـه
مياس قـدّ يلعـب الخصـر برفـوق=تلعيـب غصـن مستجـد غراسـه
و الردف لى قفا على خصره يلـوق=عنده علـى مشـي التغنـج فراسـه
و العين عين اللي علا كل شاهـوق=حـر علـى الهـدات كلـه عياسـه
و الخد برق لى لعـج نـوّر السـوق=و إلا لميع الشمس من فـوق ماسـه
اما شعرها لى انتفض كنّـه عـذوق=لـو شافـه العابـد يجيـه انتكاسـه
لى قام يرقص و الشعر ينتثـر فـوق=كل العـذارا يوقفـن مـن حماسـه