قصيدة كان معدا لها ان تلقى بين يدي الامير مشعل بن عبد العزيز في حفل ختام مزاين ابل سبيع الغلباء ولعدم حضور الامير اعتذر الشاعر عن ادائها مع العلم انها القيت في الملتقى الثقافي لقبيلة المجامعه
قبل لابدا في جديدات الألحاني = وأكتب بيوت القصيده لقاريها
خير مابدابه وماينطق لساني = ذكري للي له صلاتي مصليها
لن ذكره فيه صحه للأبداني = وأساله نفسي على الحق يبديها
عاد عيد الفطر في كل الأوطاني = وأمة الاسلام في احلى لياليها
وعاد عيد سبيع في عيدها الثاني = عيد حاضرها وموروث ماضيها
فيه تكريم لحلوات الألباني = من الامير العادل اللي يراعيها
مشعل ال سعود في كل ميداني = يدعم الابل مثل دعمه لهاليها
جعل حظه وين مايتجه زاني = والمراجل كلبوها مهاويها
كل موقفٍ له مكان وعنواني = مثل ماتعرف الاوادم بساميها
الوعد الأول قبل نص شعباني = والليالي ماتعلم بخافيها
والوعد الآخر هذا موعده حاني = واقبلت سفن الصحاري لراعيها
قوموا حفله طويلين الأيماني = غرب عرق سبيع شرقي رواسيها
الأبل الأبل شأنها عندنا شاني = كسب اهلنا الاوله من مغازيها
هي عظام المال من ماضي الأزماني = وهي غناة اللي يعرب مجانيها
في المراح تلاد من كل الألواني = خيرة الذيدان وصلت نواديها
مجهمن ماتنتقدر بالأثماني = الحلا والزين متجمعن فيها
الظهر متنكسن خلف الأمتاني = والوجيه اللي طوالٍ لواحيها
هي كبارة كل أميرٍ وسلطاني = ماحلا عقب المطر قص اثاريها
والبكار اللي مثل مرو صواني = مغترٍ عن راسها خرعٍ اذانيها
زين راسٍ تحته العظم عرياني = تتبع القعده فحلها يباريها
من صليب الصوت في راسها جناني = عين تفتنها وعين تبكيها
وإن حصل للملح نارٍ ودخاني = لحقت الغلبا وعرفت عزاويها
غيرها صفرٍ ليا صرت ظمياني = وانت في دارٍ بعيدٍ مضاميها
لارفعت الصوت حديٍ وهيجاني = اقبلت مافيه ذودٍ تجاريها
والجمال عقود لولو ومرجاني = عانها شعلٍ صغارٍ سماريها
خفها ياطى على الأرض مالاني = في المواقف رافعه راس راعيها
كم تفك رقاب وتسد دياني = عزتي للي من المرح مخليها
يوم صالات القبايل والأكواني = دونها نار الحرايب نصاليها
دونها نجدع مداريع فرساني = والاعنه في المراكيض نرخيها
من يجيها يبغي الكسب طمعاني = ينثني منها وهو معذرٍ فيها
وإن جذبها البرق من غر الأمزاني = والمنابت فيه زانت مفاليها
مانرددها ولانركز العاني = غير فرسانٍ وخيلٍ تباريها
لين سل معزي السيف شاماني = دار صبحها ودارٍ يمسيها
أهل ستينن يشيلون الأكفاني = بايعوه البيعه اللي وفوا فيها
عيدوا في الليل بالعبد عجلاني = رحبت واقبل المعزي يلبيها
والمنادي في الضحى يعلن إعلاني = الحكم لله ثم من سطى فيها
ضمته فرحه ورهبه وعرفاني = قبل يظهر مالها احدٍ يعزيها
وحد بلاده على شرع الأيماني = العداله سيرته من مباديها
جعل له في جنة الخلد مسكاني = رددوها آمين يامستمع فيها
وأخلفوه أهل العداله والإحساني = كل منهم سيرته نفتخر فيها
قبلة الإسلام وخير الأدياني = طبقوا شرعه وساد الامن فيها
والرعيه كلها صف وإخواني = لادعى الداعي بالارواح نفديها
عاد عيدك ياملكنا كحيلاني = من قلوبٍ حبكم ساكنٍ فيها
يامليكٍ صار للعدل ميزاني = التهاني من رعيه لراعيها
وأحفظك مولاك من كل شيطاني = وافرح الله كل عينٍ بغاليها
وأبو خالد في المهمات عواني = نايبك في كل دعوى وقف فيها
دوننا ماحط قفلٍ وبيباني = مثل غيثٍ ميت الارض يحييها
يالله اللي مامعك واحدٍ ثاني = يامصور كل نفسٍ وباريها
ديم الأمن في موطني وأحفظ الباني = صقرنا صقر العروبه وحاميها
والختام عطور مسك وريحاني = مع نسيم النود لاهب ذاريها
الشــــــــــــــــــاعـــــــــــــــر
سعد بن عويد بن ثواب المجمعي السبيعي