[خالد بن عياش]

جينا نلبي دعوتك يابن حيلان = لوتكثر الاشغال منا ومنا
واجب علينا لادعانا كحيلان = موالله انقول الظروف اشغلنا
لوهو بعيد الدار جيناه من شان = حقوق ومواجيبً علينا الزمنا
سلام ومعايد وابارك لسلطان = وزيارة ارماح العذية وهلنا
من ربع ابن جروة سلامً وعرفان = الربع ابن مجفل زبون المجنا
عينين في راسً شمخ فوق مالان = سوا سوا لو الديار ابعدنا
انا بني صامل كريمين الايمان = الاسم يكفي ياغشيمً جهلنا
إنا بني صامل ولانا بني كان = معناه لاجن الشدايد صملنا
من لابةً بين العرب ذكرها بان = سبيع لامن قيل حنا وحنا
اهل الرمح والسيف والخيل وعنان = واهل الكرم والحيل وهيل وبنا
اهل المفاخر مانفاخر ابهتان = واهل الثلاث افعولنا ميزنا
إنا هل العشر المردف ابرهان = واهل البشوت الضافية والمحنا
متيهين الجار للجار عنوان = ودخيلنا من يقربة لازبنا
ايهابنا القاصين ويهابنا الدان = قبيلةً بين القبايل نزلنا
في نجد خذنا ديرة شانها شان = ياكثر من جاها وزحنا عنا
اجبال وفياض وعروقً وصمان = منها اجمال القوم تحسد جملنا
وسيسانها وديان وبستان بستان = فيها مهانيع العذوق اسحرنا
التمر والما الحلو والغير ضميان = بوقتً يعيش ابه القوي في وطنا
كلً تمناها عليلً وشفقان = مير المنايا دونها لو تمنا
من دونها ربعً ملابسهم اكفان = بياعة الارواح في سوقهنا
لاصاح ثم قالو على الخيل سبعان = شفت المنايا قدمهم سجدنا
طبعً نفض الجمع من ماض الازمان = نرهه العشا لطير والي عونا
كم راس شيخً طار من فوق الامتان = قدام ربعه شيف يوم ايتثنا
حماية الوديان لاقيل وديان = اطيب من الطيب ولو عال علنا
تحدرو منا على الخيل فرسان = نفخر ليا قلنا هل الخيل منا
فرسان شجعانً ويتلون شيخان = شيوخً ادهاه افعولهم نومسنا
ثم حدرو يمشون في شف الاضعان = ولعيون ملحاً مانبيها تحنا
اخذولهم دارًتتوق الها الاذهان = ماجت بحب اخشوم وضحكات سنا
لولاك ياضرب النمش وادهم الزان = لاما استقرينا بها مع ضعنا
ارماح نمشيبه ليا حد ساقان = وفالحاير ابيوت السبيعي اتبنا
دارً خذيناها ماهي ورث جدان = عنها صناديد الجموع انزحنا
خذنا عصب نجد وسنامه بشامان = يوم المغازي في سنينً مضنا
من غير نقصً فالقبايل وحقران = قبايلً افعولها شيدنا
ثم جانا ابو تركي وصرنا له اعوان = وحد قبايلها وعدله شملنا
وصارت اربوع المملكة امن وامان = نمشيبها مانذكر الي شحنا