[منسم الحفيات]

المشاركة الأصلية كتبت بواسطة مخايل الغربي

بسم الله الرحمن الرحيم

قصيدة الشيخة للشاعر / مقحم النجدي الصقري العنزي

ياالله يامطلوب ياوالي الأقدار= أنت الذي مدات جودك لطيفه
أطلبك يامعبود عاون هل الكار= وتحل شطاتٍ عليهم كليفه
أللي مجالسهم بها بن وبهار= ونجرٍ يصوت للنشامى رجيفه
يامزنةٍ غرا من الوسم مبدار= اللي جذبنا من بعيدٍ رفيفه
تومر على كل المفالي بالأمطار= وتصبح بها ديران قومي مريفه
ترعى بها قطعاننا سر وجهار= ترعى زماليق الفياض النظيفه
في ضفة الله ثم جبرٍ وجبار= خيالةٍ يوم الملاقا عنيفه
ترعى بها وضحى من الذود معطار =غبوقة الخطار عجلٍ عطيفه
ويبني عليها بنية اللبن بجدار =عقب الضعف راحت ردومٍ منيفه
ماهي حكايا مسردٍ عقب مانار= اللي هرب وأطراف رمحه نظيفه
والصبر مفتاح الفرج عند الأذكار= ولا صابر تصبح حواله كسيفه
خطو الولد مثل البليهي إلى ثار= زودٍ على حمله نقل حمل اليفه
وخطو الولد يبهش على موتة النار= بين العرب يشبه لخطو الهديفه
وإلى بخصته ماسوى ربع دينار= صفرن على عودٍ تضبه كتيفه
وخطو الولد مثل النداوي إلى طار= صيده سمين ولا يصيد الضعيفه
إلا ومع ذلك لك الله لنا كار= عن جارنا ماقط نخفي الطريفه
ونرفا خماله رفية العش بالغار= ونودع له النفس القوية ضعيفه
ولا نبدي الخافي إلى صار ماصار= يفلج قصير البيت لو بان حيفه
والجار لابده مقفي عن الجار= وكل بجيرانه يعد الوصيفه
احدنٍ على جاره بختري ونوار =واحدنٍ على جاره صفاةٍ محيفه
نكرم سبال الضيف حق وتعبار= لامن ولد اللاش شح برغيفه
ولابدها تصبح تواريخ وأذكار= وتبقى لدسمين الشوارب وظيفة

وأنتم سالمين والسلام

أخوي / مخايل الغربي مشكور على موضوعك العذب والله يجزاك خيرا ويبيض وجهك ولا هنت مع أطيب أمنياتي وخالص التحية .