نشدية شيوخ سبيع عني يا بـو راكـان = نياشيـن فخـرٍ فـوق الامتـان برّاقـه
تحياتهم وصلت مع الشكـر والعرفـان = لهم للسلام اللي وصلنـي علـى فاقـه
اذا كان يبهج خاطري طـارف العربـان = اذا ارسل تحياته وعبـر عـن اشواقـه
اجل كيف لا جات التحايا من الشيخـان = طوال العمـار اللـي للامـداح سباقـه
سلاطين قيـف سبيـع حمايـة الحـدان = بيارق فخرهـم فـوق الامثـال خفاقـه
شيوخ دفعهم طيب الاصل وعلو الشـان = لنيل العلا و مصافـح المجـد وعناقـه
تعلوا سنـام العـزّ وهـم بعـد شبّـان = وجت اذكارهم رايات وشموس شعاقـه
ولا خالفوا في نهجهـم منهـج الجـدان = توالـي الحيـا لاول مناشيـه لحّـاقـه
لا ذكرت علوم المرجله ذكروا السبعان = لهم عروة وثقى مـع الطيـب وعلاقـه
ربيع على الاصحاب قيظ على العـدوان = لراعي الوفا عـونٍ و للمعتـدي عاقـه
وانا راس مالي عرف ومواصل الظفران = رصيدي مع التجار في المال واسواقـه
في سوق الجميل اكيل وارجح الميـزان = وفي سوق الردى مالي بعيـر ولا ناقـه
احب الكفو واشريه لو غليـت الاثمـان = وابيع الردي با بخس ثمن واشري افراقه
ورى كل قصر شامخ تاقـف السيسـان = ورى طيب نوهات الرجل تاقف اعماقـه
ولاني باحسب احساب الاشكال والالوان = مقياس الرجل عنـدي نوايـاه واخلاقـه
هذا والبيوت النـادره واجـزل القيفـان = ما تلحق قدر وحقـوق حمايـة الساقـة
ولكـن عسانـا نوفـي الديـن للديـان = ونهدي جزيل الشكر والذكر فـي باقـه
وانا عقب هذا اليوم لو شحوا الصدقـان = علي بزيارتهم وجـا الوصـل بشفاقـه
تكفيني مراسيل ابن جروه وابن قطنـان = وسلام الشيوخ اللي وصلني على فاقـه
وكل الشكر للمشعبي مكـرم الضيفـان = له البيض نبنيهـا علـى كـل شوهاقـه
الشاعر: عبدالله الشهراني