في صحراء نجد طفل واطرد وراء طير ( ملهي الرعيان ) هذا اسمه عندنا
المهم تو واصلين جهة روضه من الرياض الي بالقرب من العاصمه
لنا عرب رحل وبحلالهم ويبون يزوجون عيالهم
وجيناهم من الحجاز نفرح معهم كلهم اعيال اعمام واخوال المتزوجون
انا شفت هالطير وراه هو يمشي شوي ويوقف واذا وصلته مشى
وانا وراه من قبل صلاة الظهر الين صلاة المغرب
سبحان الله ما حسيت لا بضما ولا بتعب
يوم ناظرت وراي ولا والله البيت مختفي
ادور يمين شمال الا هناك بيت شعر
دخلت على هل البيت ابغى ماء ابغى ماء عطوني الماء وحطيت راسي ونمت 0
هناك بالجهة الثانية انقلب الفرح هم وقلق وخوف
لا جا الليل راح فيها الطفل تاكله وحوش الخلا
المهم بعد صلاة العشاء صحاني معزبي
قم يا ولدي انت وش اسمك ( منطور مطعط)
الله يخلف علينا حتى اسمه ما يعرفه
لكن فيه عرب الفلاينه عندهم مزين
يمكن هذا من ضيوفهم ركبنا الذلول
وانا مغير ابكي فقدت امي
وعرفت انها ما هي بالبيت الي انا فيه
ويش يسكتني ما شا الله عليه اديب من يوم وانا صغير
المهم بعد رحله يمكن ساعه وصلنا بحدود الساعة الحادي عشر ليلا
ولا الناس شابين ضيانهم بروس المتون
عساي اشوف النور المهم وصلنا
ويوم شافوني ولا والله كأنهم شايفين شئ ما احد حصل عليه
الوالدين الله يثيبهم ما نعوضهم شقاهم معنا لو نقلي لهم الزيت بيدينا
انت وين رحت قلت الطير ابا امسكه ويهرب مني
قالو لي هذا الجني لا عاد تقربه يبا يوديك بعيد عشان ياكلك
صرت كل ما شوف طير ولا اي حيوان اقول عنه جني
وصارت تاريخ عند الجماعه يوم رحنا لنجد وضاع منطور مطعط
يوم كبرت شوي وكل ما كبرت حدثوني فيها
بعد ما كبرت علمت عيالي فيها
قالولي طيب ليش تهاوشنا ما دام انك كذا اول وانت صغير
اقولهم الي يلدغ من الحيه يخاف من الحبل