[مسلط العتيبي]

أرتاح في ديرة خوالي وجدي =لو ماأهتني فيها من الزاد مطعوم
خليتها ياناس ماهوب ودي =شي مقدر في حياتي ومقسوم
ياناس خلوني لا أبيح بسدي =وأقول شي داخل الصدر مكتوم
أبكي ودمعي سايل فوق خدي =على الديار اللي بها أطلال وأرجوم
شوفي لها عن كل شي يسدي =وفي حبها والله مانيب مليوم
ودي بداري لكن الوقت ضدي =قاسي وغيره ضيقة الصدر وهموم
الدار داري غيرها مانبدي =ودي بها لو حالوا الفرس والروم
والله ما أتركها وعنها ما أشدي =ولو ساوموني فأرضها ما أقبل السوم
بوصيك يالمرسول ياللي تودي =ود العلوم الطيبه دايم الدوم
لأهل الكرم والطيب والعود ندي =ذباحة الخرفان والفطر الكوم
وقت الشدايد والمحن ماتصدي =فزاعة في الضيق نطاحة القوم
يا لا يمي فيها تراها مردي =باعيش فيها دام ماقيل مرحوم