جا من سلايل محتمين الثبارا = خط يراعه بالمناجاه صرا
جاء من حفيد منير ستر العذارا= مفتر عزوم اللي بنفسه يورا
الخيل من صوته يجيها ذعارا = لاكثرت العزوة بساره وسرا
من ابو سنون ليا شمال الزبارا = في ظلهم يكبر ظهر كل عرا
ولا يجهل فعول القروم الدجارا= ياكود من يجهل جمادا وغرا
امجادهم تشدي علم فيه نارا= او برق غيث تالي الليل سرا
حرار مافيهم فصيلة وكارا= والحر ضار بالفعل مايضرا
واللي عن الامجاد صدوا يسارا= زاد اليرا في مدحهم مايجرا
المدح فيهم لو يضير ضيارا= ينفر ولا يلزق بهم لو يغرا
وسلطان لجدوده تقفا الاثارا= ونهج على منهاجهم واستمرا
وارسلي اللي مثل سور الحوارا= مشاعر داخل غلاف مزرا
والكاشفه واللي عليها ستارا= تراه يعرف سنها من تفرا
وبعد فلقت اصداف لول المحارا= ديد الشعر من زايد الشوق درا
وماحزت من صيده بعد ماستذارا= لعله يناسب لسامع وقرا
ويوم ابن مقعد خصني مستشارا= يقول في تالي الدهر وش نورا
وجهت نظرنا ماعليها غبارا= بيضا جليه في طرفها تمرا
الوقت ياسلطان ماله قرارا= من خلقة آدم بين سرا وضرا
مر لهل البحرين فيه انتصارا= ومر النصر لهل الزبير وسامرا
واللي حمو بالسيف بيض الحبارا= على بقايا آثارهم ماتمرا
قد جالهم عز طويل الجدارا= ودار الدهر وانهار ساسه وخرا
واليوم حنا في رخا وازدهارا= في بيت عز بالشريعه مذرا
بحكم هل العوجا طوال العمارا= فامن وفي نعمه وسرا وقرا
وان كان حسك من زمانك ضرارا= فاسمع بعد جا للسوالف مجرا
ترى الشدايد للرجال اختبارا = والجايزه للي على الجود اصرا
كم ناس اطوال عراض كبارا= وسمان لكن فالشدايد تهرا
وكم واحد بالصبر مثل الحجارا= لو ظرفه ادها من ظروفك وامرا
لكن عليك الصبر والانتظارا= واللي يبر بوالدينه يبرا
والعز لو داره بعيد المزارا= اجعل ديار دون داره ممرا
وشم للعلا واسلك شريف المسارا = لاتنزعج من قول فاجر وبرا
ولدري ولو دار الفلك واستدارا= وشفت السعد حدرك فراشه يشرا
ودنياك ياسلطان خيبة دبارا= ممر مالحدن عليها مقرا
ويكفي عن طوال الكلام القصارا= وتكفيك الاشاره ليا صرت حرا
واختم كلامي بذكر منشي الثمارا= الواحد اللي في عراه انتعرا