[جزل العطايا]

	والله إني كنت ألوم اللي يضيق إن غاب خلّه = لين جرّبت المحبه والفراق وقلت توبه!! لعنبو . جد المفارق فيه هم . وفيه ذلّه = أثر كل الحب لذه والفراق أكبر عيوبه أمس . فارقت الغلا ومفارق الخلان علّه = والعلاج الوصل لاتبلش طبيب ولا حبوبه الزعل هو سبّة الفرقا يهّز الحب كلّه = ليتني طولّت بالي قبل لا يعلن غروبه واهني اللي وسيع الصدر صدره وسع فلّه = غلطة الصاحب تجي وتروح ماهي بمحسوبه عارفٍ قدره وقدر اللي يحبه في محلّه = ذاك نفسه لا حشا ماهي علي الحب مغصوبه سامح الله طبعي اللي للتغيّر يالعلّه! = قاضبٍ خلك عزيز . ولين صارت لي عقوبه ليش تحسب غلطة الصاحب علي الصاحب مذلّه !؟ = ليش ماتحسب ميانه لوتجي عشرين نوبه ؟؟ لا وربي كنت أحبه حيل مادوّرت زلّه = لا تشكك في غلاه . ولا تساعد في هروبه لايمي . قبلك تعبت ألوم شعار المجلّه = وكنت مؤمن في مقولة أعذب الشعر الكذوبه وأثر كّلٍ في حياته له تجارب مستقلّه = وأنت لا تشره علي . مثلي . وتبلا لك بحوبه كان جابتك الحميّه روح له تكفا وقلّه = لا يخليني وإذا ودّه يخفف من ذنوبه يستخير وله غلا قلبٍ صدوقٍ ما يملّه = فدوةٍ له كل قلبي من شماله لي جنوبه يوم قفـّا والخفوق يفوح عقبه فوح دلّه = وسط وقدة واحدٍ عزّ الشتا والسهر دوبه لاتقهوى . بارده من برد فنجاله وزلّه = ثم قرّبها علي جال الجمر وأرهى شبوبه وين يدله هالخفوق وكل مايدله يتلّه = طاري اللي ياكثر ما أتعبت رجلي في دروبه لاطرى . جريت ونـّة من بلاده مستحلّه = مثل ماراحت بلادي مع شعارات العروبه كل هاجوسٍ يجيبه جعل شعري فدوةٍ لّه = وأعذابي . كل ما جابت لي الجبله هبوبه مشغلٍ قلبي بحبه دون خلق الله . من الله = هيه . ياللي ممتلكني حسن وأسلوب وعذوبه ماسمعت إن الخوي له بالخوي تسعين زلّه = وأنت طوّف زلتي ياعل تفداك اللعوبه صاحبي سيف الهجر . لاصرت تقدر لاتسلّه = ماتظن العفو عند المقدره أفضل عقوبه ؟؟ أيه أنا اللي كنت ألوم اللي يضيق إن غاب خلّه = لين . جرّبت المحبه والفراق وقلت توبه !!