[العـــــــــارض]

يا بو هادي ولع النار و اسمع و يش أقول ==كل ما غنيـت لـي بيـت غنـه واكتبـه
فيه حاجة قد لها أيام في صـدري تجـول==كنهـا تآكـل عظامـي و دمـي تشربـه
انهبـل معهـا و كـن مانـي بمهـبـول==بين حين و حين أهوجس و اسرح و انتبه
و من نشدني قلت حملي ما هو مثل الحمول==يملـك الرجـال ملكـه لدقنـه و شنـبـه
لو نشدت أهل التجارب رزينيـن العقـول==قالـوا المعـروف مالـه حلـي ولا شبـه
ما ملكني غير معروف زحل ٍ مـن زحـول ==الكريـم اللـي مزايـاه مـن ربـي هبـه
مدته و بل ٍ مـن الغيـث دهّـاج السيـول ==اطيب المدات و أغلى الهدايـا و اصعبـه
ذاك حثلان السبيعـي و اكررهـا و أقـول==متعب الأبطـال راعـي الفعـول المتعبـه
انجرح ظهر الجمل و انحنى رأس الذلـول==و الهبايب نودها صلـف و القـاع حدبـه
و انتهى وقت الحكي و ابتدا وقت الفعـول== لد عينك يـم حثـلان و انخـه و اندبـه
لين توحي في دماغـه مثـل دف الطبـول==صامل الفزعـات شبـاب نـاره بحطبـه
نسل فرسان المعارك على سروج الخيـول==اهل التومان و أهـل السيـوف المذهبـه
حزة ٍ فيها الـردي لا يقـول و لا يطـول==و الشجاع اللي بفـوزه يفـوزون عربـه
ما ذكرت الا الحقايق على حسب الأصـول==فيك يا حثـلان راعـي الفعـول المتعبـه



سلطان الهاجري

منقول من الصايرة