منتديات سبيع الغلباء

منتديات سبيع الغلباء (https://www.sobe3.com/vb/index.php)
-   منتدى الشعر الشعبي والنبطي ( شعراء الشبكة ) (https://www.sobe3.com/vb/forumdisplay.php?f=7)
-   -   شعر معبر عن شركة أرامكو (https://www.sobe3.com/vb/showthread.php?t=1950)

بن براك 06 - 10 - 2003 23:41

شعر معبر عن شركة أرامكو
 
السلام عليكم



بين الريس والمرئوس****صرنا علكة بين ضروس****هذا يخطط وذاك يحوس**** والله يعلم بالحالي

قال الموظف يا رئيس****في مرتبتي أبغى اخيس****وما شفت الا قراطيس**** وعود مالها تالي

قلت يا ريس هذا فلان**** في مرتبته من زمان **** وانا وعدته والآن **** ابيك توقعها لي

قال لي انتا مالك دور**** وشلون توعد يا مغرور **** الله اكبر يا بلفور **** وعدك ينفذ طوالي

يوم وجه لي هذا اللوم **** كني على وجهي ملطوم**** قلت الموظف يجيك اليوم *** وقل له اللي قلته لي

كشر وطير لي عيونه****وقال لي وين المرونه****الموظف لو تقنعونه**** بنقصه يسكت في الحالي

قلت الموظف مابه عيب****الا نقص في التدريب****ونحنا السبب يالحبيب **** محتاجينه طوالي

قال لي دربه ( بارت تايم ) **** وقطع تدريبه دايم**** وخله في ( قريده ) نايم **** ولا تفتح له مجالي

قلت باقول بفصاحه **** ارقد وخذ لك طراحه**** ما في ( قريد ) بصراحه **** لو توصل العلالي

رفع الريس سلاحه **** وقال لي هذي وقاحه**** وقلبها لي مناحه **** وحلف ما يتركها لي

هددني بصرامه **** ريسي واعرف احكامه **** ما يرجع في كلامه **** والله يلطف بالحالي

رجعت وانا افكر **** هل اكذب ثم استغفر **** واحلف ثمن اكفّر **** وقمت ارتب اقوالي

قلت للموظف المنسي****لازم ترقا ( إن بلصي ) ****لأن ( الأوت اف بلصي )**** ما عاد يمشي يا الغالي

قال لي ما دربتوني **** وفي العمل كرفتوني **** وكم مره وعدتوني**** وما عاد عندي احتمالي

انا من ( الإنتيقريشن )*** مجمد وبلا ( برموشن ) **** وغيري ماله ( لمتيشن )***( أوت بلصي ) طوالي

لكن الله يمحاكم **** ويمحا العمل واياكم **** ويمحا كل روساكم **** ولا يبقالكم تالي

قلت لا تدعي علينا**** ومافي شي بيدينا**** لكن اصبر علينا**** والله يغير الأحوالي

قال لي الله ينكبكم **** ما شفنا اكذب منكم **** صار الكذب مذهبكم **** يقدم في كل مجالي

قلت يا ريس انتهينا**** قاموا يدعون علينا **** وانت مكبل يدنا **** شف لك واحد بدالي

قال لي وحدتك منحاسه **** وينك و وين الرئاسة **** الشغله تبغا فراسه **** لازم تغير في الحالي

يا ناس انا شسوي **** عندي ريس متقوي**** وموظفي متهقوي **** اني ريس مثالي

الموظف يبغى حقوقه **** وريسي أخشى عقوقه**** وماء وجيهي احوقه ****لا ياصل النعالي

قلبي يا ناس انفطر **** ورئيسي قلبه صخر **** وصرنا ممشة زفر **** نوبخ مثل الأطفالي

حملنا مسؤليه **** وسلبنا الصلاحيه **** هذي والله بليه **** تنهد لها الجبالي

كلن يشكي رئيسه **** وريس ريس رئيسه **** وصار الموظف فريسه **** لقرارٍ ارتجالي

رضا الجميع ما يدرك **** لكن كله لا يترك **** ورضا مولانا ابرك **** من جميع الأموالي

اترك نهج الخواجه **** فكل افكاره سماجه **** وترا مالك به حاجه **** نهجه خربان وبالي

الكذب عنده سياسة **** والظلم عنده فراسه **** وان شافك يحني راسه **** وتقول انه مثالي

نبي نرجع للسيره **** ففيها حلول كثيره **** ونوجه المسيره **** الى الجنه طوالي

ما أحسن الصراحه **** فيها النجاه والراحه **** والكل تكمل افراحه **** ويعمل مرتاح البالي

----------------------------------------------------------------------------------------------------------------------------------------------------------------------------------------------------------------------------

اخواني الكرام هذا جزء يسير من معانات الرئيس المباشر وهو امر حساس جدا ولا يحب الرؤساء التطرق اليه ورد في المقال اعلاه بعض المصطلحات الإنجليزية ومعناها:

( ان بلصي ) = نظامي ومستوفي للشروط

( اوت اف بلصي ) = عكس ( ان بلصي )

( برموشن ) = ترقية

( لمتيشن ) = حدود او قيود

( الأنتيقريشن ) = الدمج ( دمج سمارك في ارامكو )

( بارت تايم ) = جزئي او نظام ساعات

( فل تايم ) = كامل الوقت

( قريد ) = درجة او مرتبه

ختاماً

نظام الترقيات في الشركة ممتاز ولكن البلا من الذي لا يحض على طعام المسكين

-----------------

وصلني عبر البريد


بن براك

خالد الشماسي 07 - 10 - 2003 04:01

رد : شعر معبر عن شركة أرامكو
 
قصيدة ما يفهمها الا أهل ارامكو


لكن تحمدوا ربكم غيركم ما لقاها .

شكرا لك أخي بن براك على القصيدة والصيد الفريد

بن براك 08 - 10 - 2003 03:02

رد : شعر معبر عن شركة أرامكو
 
السلام عليكم


هلا والله وغلا بك يا أبو عمر

نورت الموضوع ......صدقت

ما يعرفها كاملة ويشعر فيها

إلا موضف أرامكو

الحمد لله على العافية :)

بن براك

عبدالله 08 - 10 - 2003 13:39

رد : شعر معبر عن شركة أرامكو
 
ابن براك تسلم يمينك على القصيده وعقبال انشاء الله البرموشن

بن براك 12 - 10 - 2003 17:49

رد : شعر معبر عن شركة أرامكو
 
السلام عليكم

هلا بك أخوي عبدالله

الله يجيب البرموشن

بن براك


الساعة الآن 19:02.

Powered by vBulletin® Version 3.8.11, Copyright ©2000 - 2024, Jelsoft Enterprises Ltd. www.sobe3.com
جميع المشاركات تعبر عن وجهة كاتبها ،، ولا تتحمل ادارة شبكة سبيع الغلباء أدنى مسئولية تجاهها