منتديات سبيع الغلباء - قصيدة ياسحاب لناصر الفراعنه :

يا سحابٍ بارقه من مداين شرق ناض
في عيوني من مشاكي مصابيحه وميض

كنّ تسبيح الرعد في شقوقه يوم هاض
تمتمة سبع المثاني على راس المريض

كوثرٍ من كوثرٍ تحت ظل العرش فاض
ملمس الزملوق من ماطره ملمس غضيض

جعل شهلوله يديّم على هاك الحياض
وفي الثرى طشاش وبله يفيض ولا يغيض

لين من مدة يده ينتشي عشب الفياض
وكل سيل منه محنابه الأقصى يفيض

من شخاتيره عقيم الشجر جاه المخاض
وام سالم من طربها تبادلنا القريض

دار غروٍ في حمر شفته مثل الشواظ
من سنا نجمٍ لهب ناره الحمرا يشيظ

في هدب عينه سوادٍ وفي قلبه بياض
آبــ أحبه لين ناقة هل العارض تبيض

من سحر طيفه جنوبي من اللهفه تجاضّ
وللضلوع العوج من حاتميّ اسمه جضيض

في عيونه للمنايا يا ابن زيد انقضاض
جادلٍ حسنه لكلْ صاحبة حسنٍ يغيض

آه يا قلبٍ غدا مع مكحّلة اللحاظ
مثل سرّاي السُرى بين غيظ وبين فيض

الغبي من لا اتّعظ من محاجره اتّعاظ
كم رجع من سيف رمشه كريمٍ في الحضيض

في الصدر منه انبساطٍ وفي النهد انقباض
فوضوية جسمه اعطت لكلْ شيءٍ نقيض

منه في الردف ارتفاعٍ وفي الخصر انخفاض
عالم الجسم الخرافي لكلْ داله يهيض

ليس من نوع الطوال الطوال ولا العراض
في تمرّد ردفه اتعب مجزّئة الغريض

من هوى فضيّ الاطراف تبريّ
لو معَ نوح النبي ما ينجيني الفضيض

من مراده يرجع القوم خالين الوفاض
عضّ اصابيع الندم شيخهم واقبل عضيض

كلمةٍ بآقولها ما يجي فيها اعتراض
صاحب شيخ الغنادير بالبنط العريض

جادلٍ ما حاشه الا الرياجيل الحظاظ
واشهد اني بالغضي يا هل الروضه حظيظ

كم على سلمى يسالم تمنينا الحفاظ
مير ما للشيّ إلى ما حفظه الله حفيظ

تنتفض لاحرار من عيشة الذل انتفاض
يوم ولد اللاش في الذل يعجبه المقيظ

ما درينا وش ورا ضحكة القاضي عياض
لين قدّامي عياضٍ كشف عورة معيض