قصيدة طلبتها مني (( .. ام .. )) تشكي هجر ابنها العاق ..
 

قصيدة طلبتها مني (( .. ام .. )) تشكي هجر ابنها العاق ..
وترجمت معاناتها هنا اتمنى اني وفّقت بهالقصيده
والله يقدرني على نشرهاواتمنى ان يقراها ابنها العاق ..





[center]بديت ذكر المعتلي ربّ الأرباب .. الواحد المعبود منشي السحابي

ومن بعد ذكره يا قلم خط بكتاب .. نصيحة ٍ منّي لبعض الشبابي

نصيحة ٍ تنفع عريبين الأنساب .. ارجي وراها من الآهي ثوابي

مضمونها أم ّ ٍ شكت ابنها الشاب .. له مدّة ٍ يمكن سنه في الغيابي

أحس قلبي عقبها اليوم منصاب .. ونظّمت قافي ابغي أبوح مابي

يا هاجر ٍ امــّك ترى قلبها ذاب .. خاف الولي من قبل يوم الحسابي

باسباب هجرك اتلفت كل الأعصاب .. وخيّم عليها الحزن والأكتئابي

عقبك تعاف الزاد وتعاف الأطياب .. ولولا الحيا طرّة سببك الثيابي

طيفك يباريها وصوتك فلا غاب .. تصيح باسمك عل ّ تلقى جوابي

تنشد عليك بعيد واصحاب واقراب .. وصار الأمل بعيونها كالسرابي

امّك جعلها الله مــيــزان وأسباب .. إمـّــا الـــى جـنــّه وإمّا عذابي

امّك عن النيران لك ستر وحجاب .. الزم رجــلــها لا تــعـــز الجنابي

حذراك تزعلها ولا تكشّر الناب .. ويجزيك ربّ الكون باقسى عقابي

حذراك تعصي امرها لأجل الأحباب .. ويبلاك ربّي بالفتن والمصابي

ياما سهرت ترعاك والدّمع سكاب .. وفي قلبها همّ وكثير اضطرابي

تطرق عشان دواك باب ٍ ورى باب .. ما همّها لأجلك جميع الصعابي

تفرح إذا تفرح وإذا ضقت ترتاب .. وأمرك على طول العمر لك يجابي

امّك تحمّـلتك شقى هم واتعاب ... والــيــوم تـنـكر فضلها ما تهابي

اتعبتها مولود واتعبتها شاب ... حطّمت قلب امّك عساك الذهابي

تعال لأمّك كان للخير رغـّاب .. ويا سعد من يسلك طريق الصوابي

تم الكلام الصدق والكذب ينعاب .. وعلم الحقيقه ما يضرّه ضبابي

يا هاجر ٍ امك ترى قلبها ذاب .. خاف الولي من قبل يوم الحسابي


وسلامتكم[/center]



الشاعر عاشق شعر وانتظروا مني المزيد ولكم تحياتي..............