( راع الـوفــــاء )
قم يا نديبي و ارتحـل لـك نجايـب = حمر بسعر الرخص ماهـي تباعـي
وليا خذيت العلـم مـن راس شايـب = صـدر و ورد بالعلـوم السنـاعـي
بلـغ سلامـي و قرنـه بالرحايـب = للي جنابـه ريـف غالـي الطباعـي
قل للـذي يشكـي زمـان العجايـب = مالك على حكـم الزمـان استطاعـي
غريبـة الدنيـا و فيهـا غـرايـب = حتى العمى فيها لبـس لـه قناعـي
ما عاد تفرق بين مخطي و صايـب = صارت على ما قال شـي أنطباعـي
الصاحب اللي وقت الأحـداث غايـب = كثرة ظروفه مـن جهـود المساعـي
راع الوفـاء دايـم دروبـه شبايـب = وبالصبر يقطع لـه فجـوج وساعـي
يا صاحبي وش يودع الظـن خايـب = لاصرت في بعض الأمور اقتناعـي
المشكله في الوقت لا صـار عايـب = وتهون لأصبح صاحب الوقت واعـي
الوقت ياخذ بس مـن غيـر جايـب = لو كان ماله بعض الأحيـان داعـي
بعض الليالي تجعـل الدمـع رايـب = ينصاع في التيـار مـن لا يراعـي
القلـب مـن حـر اللواهيـب ذايـب = له من عذابـه كـل يـوم التياعـي
من سـب لـه نـاس بليـا سبايـب = بين الملا لـو يخفـي السـر شاعـي
ان طاب جرحي خاطري صار طايب = وان زادت جروحي فقـدت امتناعـي
كم واحد في بحـر الأحـلام سايـب = يلعب بـه المركـب بليـا شراعـي
من ذاق سـم الـداب جـر النحايـب = واللي تصنـع بيـن انـه صناعـي
وأن اعتقد ما شخص عن شخص نايب = الكل عـن نفسـه يـذود و يداعـي
الشاعر المبدع / بــدر بن عـبـــّاد ال علي