السلام عليكم ورحمة الله وبركاته
هذي قصيدة لشاعر / مناحي بن نمشان الملحي السبيعي رحمه الله رحمة واسعه
وهي في جاره وصديقه / محمد بن صمهود المداريه السبيعي
يقول بن نمشان
ونيت لي ونة ٍ والامة رقود=من عقبها ببطي عن النوم قالي
كما يون اللي من الزمل مضهود =الاصهب اللي من صبور الجمالي
لا حط فوقه قد بالرمله تكود =موسق شيله بشيل الهزالي
من عقب بيت شفت ماجاله ريود =مغير انا والنجر ويا الدلا لي
نجر ثمين من هدايا ابن صمهود =اللي على أهداه ذرب العيالي
شبيت لي نار ٍ بها السمر مرجود =وحمست من بن اليمن ما طرالي
برية ٍ كن ريحها عنبر وعود =يلزم شراها لو شرينا بغالي
ودقيت جاله دقة جالها زود=تفريج هم عقب ما ضاق بالي
وقدمي تراهو متعبة معدن الجود=في مجلس يلفون فيه الرجالي
بني عمر اللي بالعطا تعطي القود=جنوبهم واللي بشرق الشمالي
هل فزعة ٍ يفرح بها كل مضهود=لا عسكر البارود والحمل مالي
صح العدد فيهم وبلقى لي شهود=يشهد لنا من كل ذرب ٍ جلالي
ولا ينحسب فعل على غير ما كود=الا وفعل ٍ مثل نقد الريالي