لا اقبل سواد الليل جاب الهواجيس = تحرك براسي عن النوم هوجاس
تسهر عيوني كن فيها دبابيس = والقلب يقرع بين منحي الاقواس
يقرع قريع الشن وعروقه يبيس = يدن صندوقه مثل دن الاجراس
تاخذبه هجوس الليالي مراويس = لا ذعذع الغربي بذعذاع نسناس
جدد جروح مبطياتن مراميس = اللي زرعهن في خفا صدري الياس
عليك يا راع العيون النواعيس = سودن هدبها كن في طرفه نعاس
والعنق عنق اللي ربت فالطعاميس = تذيرت سمعتلها اصوات واوناس
تجفل ليا هبت هبوب النسانيس = ماترتع الا في عثامير الاطعاس
ضامر حشا والجسم يشكي الملابيس = حبه بنا في القلب بنين على ساس
ياسوق قلبي سوق هجنن حراسيس = عقب الشحم مثل العياسيب يباس
عليهن اللي يكسبون النواميس = ماخافوا الا من رجوعن بالافلاس