[فراج آل ماضي]

المشاركة الأصلية كتبت بواسطة عاشق الباديه

قصيدة فتاة نجد=
دعا الهاجس اللي ردلي من جديد وعاد=مشاعر خفوق جت من اقصاي ترقب له
دعاها وجت له يوم جار الزمان وزاد=عليها من همومه وهي في عنا قبله
قديم وجديد للزمن والحياة ابعاد=تجي عكس بعض احيان شي ترتب له
وتصبرت لين إن المشاعر بقت ماعاد=تحمل امورً خوفي الجرح تقرب له
هذا والقناعه كنز عن واقع استشهاد=الانسان ماله غير مالله يكتب له
عزيز الجلال اللي له المسلمين عباد=عسانا من اللي نية الخير تحسب له
وعلى الله تياسير الزمن والكريم ان راد=مواهبه حظ اللي من الخلق توهب له
ومنار الوفا يبقى منار على الاشهاد=وهله في جميع احوال الايام تتعب له
كبير وجدير بالوفا صاحبه لازاد=على الخير دايم راية العز تنصب له

مجاراة عايض فرزان السبيعي=
قريت الجريده يوم صدفه بلا ميعاد=وشفت البيوت اللي كتب لابس الدبله
بيوتً حلاوتها تشابه لحلو الزاد=عسالله يبيض وجه من كان تنسب له
على شان ذالمخلوق من تالي الاجواد=دعيت وطلبت الله وانا متجه قبله
عسا ديرته بالسيل غصبً على الحساد=على موطنه جعل المطر ينتثر وبله
معاني بيوته تطرب الشاعر النقاد=ويطرب لها اللي يرفع الصوت عند ابله
معا زين تعبيره نظمها بجد وجاد=وانا ارتاح للمعنى النقي واتعجب له
يولف بيوتً قبل توليفها شرّاد=كما شرد صيدً جافلً له معا عبله
جواهر مليحاً جت من اقصى الحشا ورّاد=كما ورد خلفً طيب الحظ تحلب له
مثل من زرع وردً ويجنيه بالحصاد=على طول يبقا في رصيده ومكسب له
يقول القناعه كنز وهي كنز بالوكاد=احب الكلام الصح والنفس تطرب له
والانسان ما تصفي حياته بدون انكاد=مشاكل زمانه بعض الايام تنشب له

وتقبلو تحيـــــاتــــي

بيض الله وجهك على هذا النقل الاكثر من رائع والجميل جداً وصح لسان الشاعر : عائض بن فرزان السبيعي