[الـحواس]

القصيده التي نسبت لمبيريك التبيناوي في الموضوع اعلام هي في الحقيقه للشاعر جارالله ابو جري

قالها مادحاً بالامير محمد العبدالله الرشيد وقد اوردتها لكم للفائده

-------------------------------------------------------------

مزنٍ نشا عقب الضحا من هضابه = دهاش مرهاش سهج كل حلَه ...
مزنٍ على مزنٍ تقافا سحابــــــه .=وأنا اذكر الله ضافي نجد كلَه ...
أسقي من الوفره (1 )لضلع اللهابــه (2).= وسنًد لينبع (3)واصبحت مستطله ...
وديًم على خذما (4)وصبٍ انسكابه = وقد سالت الوديان من غشنةٍ له ...
واصبح على ميقوع(5 )عزل ربابه .=وتواقعت منه الطيور المجلـــــه ...
على الطعوس الحمر طير ترابه .=ملَى البراك وخضرت عقب عله ...
كن الشهر بركون نايف سحابه =خط الحيـــاغب المطــربان كلـه ...
وحمود أبو ماجد غميق صوابه = ريف الهجافا كان هي مشفحله ...
للضعف شط ما يقلص شرابه .=وعلى الضديد أنكد من الشري كله ...
والضيغمي كل المراجل غدابه = لوى عليها كلها معصب لــــــــــه ...
الحكم سيف وجوده مع انصابه =. بدر جلى كل النجوم المطلـــــــه ...
لاهو بمشرقها ولايوم غابــــــه =ولأبعدتنشي به البيض للـــــــــه ...
لاباجود جودا ولا ينصخى به = ولا حاتم صخى ولاهو لد لــــــــه ...
طرش الخنافر والنجاجير جابه = وجانا البشير وقلت انا الحمد للـه ...
من ديرة الخرمه (6)الياضلع طابه =شروا المحوص الواردة جرة لـــــه ...
شقح كما الريلان جرد رقابه =كدر يوسمها سواه الأهلـــــــــــــه ...
ابن منيخر عقب ذا عاف مابه= اقفى بعجمان الرخم مستذلــــــــه ...
ياويل ضد الضيغمي من عقابه= من ادعى بالبعد عي يدلــــــــــه ...
جاء للطبيق(7 )اودع عليهم ضبابه .= بوديان بيشة(7 )ماجرت غارة لــــه ...
فجحان ابن ناصر ظهر من ثيابه =فصخ يوم انه... شلوطه ثم ملــــه ...
راحت مظاهيره وطرشه نهابه =عداه سلطان العرب عشقة لــــــــه ...
وعلى بطي من فرز الابطال عابه = طير السعد حطه تحت مخلب له ...
للحول ما والله يبري صوابه= جاه العقاب الصيرمي ثم شلـــــــه ...
فهدٍ زراج الليث ماينهقابه.=حرٍ...طيور الشرق تخضع لظلـــــله....
افطر وصام وثم نزل كتابه.=.وافطر ودنـّـا كل وجنــا ســـــــجلّه...
عقب الصخور استزهبوا وانتوابه=.وخلا الثقيل وفاض نجدٍ بســله....
بشهبٍ لك الله كنهن الذيابه.=.ياما فجن من غرةٍ مــســفـهلـــــه....
شيخٍ خذاه العزم (لديار يابه)..(8).=.تقللت...تتبع..ذراها وظلــــــــه...
بامر الولي وسعود حامي جنابه.=على ابن زبن مع سنا الصبح عله..
قفوا المتلّي هو وعمره صخابه.=ليا اوجهوا...قدامهم قاصرن لــه...
ياما صفق ذولا بذولا...وجابه.=ويـــــاما بهج كبدٍ وكبدٍ....مــغلـّـه...
وياما عطى من مهرةٍ ماحكى به.=ومن صرّةٍ تغني الفقار المقـلـّــه...
يامير ياعز الجبل والـقـرابــه.=.يامودعٍ...بقلوب الاضداد علـّــه..
يا امير تشكيك الرمك مع ركابه.=اخفوفها وردوفها مستملـّـه....
تسعين ليله والرسن بالغرابه=.لياما غدن ذروات مثل الاهله....
ياسور نجد ونورها وانت بابه.=الرجل من مشيه على الشوك مله..
تعطي الاصايل والسلايل وهابه=.وانا اتحرى والله الي يحلــه...
صلوا على المختار باحسن جوابه=عدّ الرمال وماذرى الريح كله..
------------------------------------------------
1-الوفره.... الكويت
2-اللهابه في الصمان
3-ينبع ....المنطقه الغربيه....البحر الاحمر
4-خذما قرب الجوف
5-ميقوع -قرب الجوف ايضا
6-ديرة الخرمه.....بين الطايف وبيشه
7-وديان بيشه....بيشه المشهوره قرب خميس مشيط
8- ديار يابه.........العراق