[poem= font="Simplified Arabic,4,black,bold,normal" bkcolor="transparent" bkimage="backgrounds/27.gif" border="ridge,6,orange" type=0 line=0 align=center use=sp num="0,black"]
يا سبيع الغلباء تراكـم مسميـن
من خيل ابن فراج حامي الدبيله
مهره عربيـه تسـاوي ملاييـن
صار اسمها الغلباء وهي تعتنيلـه
غلاك يا الغلباء على الراس والعين
من يوم سميتي على اسم القبيلـه
بنت الجواد ومن خيول السلاطين
ساس عريق ولا يـدور بديلـه
يعيش من سماك وأنتـي تعيشيـن
اسم أصيـل ولايـق بالأصيلـه
سماك شيخ من كبـار الجماليـن
سبيع مروية السيوف الصقيلـه
عاش البليداني حليـف المياميـن
راعي الحمياء اللي يروز الثقيلـه
تسابقي مع خيل الأقصى والأدنين
لا جت جياد الخيل مثل المخيلـه
بـإرادة الله بالمذهـب تفوزيـن
كأس السباق اللي ثقيل مشيلـه
اللي عليه رسوم نخلـه وسيفيـن
غاية جمال الكأس وأنتـي جميلـه
تستاهلينه يـوم جيتـي ترفيـن
رف القطا اللي وارد لـه ثميلـه
اسمك عليك وسام لو كان تدرين
لقـب قبيلتنـا الـذى نتميلـه
إذا انتخينا بـه تخـر الشياطيـن
لو كان شمّـر شاركونـا بقيلـه
قلنا وقالوا واشتبهنـا بالاسميـن
حنا اسمنا الغلباء وغلبـا مثيلـه
هذا لقبنا والسناعيـس وافيـن
لنا الشرف مع كاسبين النفيلـه
من ماضي حنـا عليهـا معيـن
لا غيرنـا سمـي ولا يستويلـه
ومن غيرها لنا فعول وعناويـن
ما هي بمجهوله ولا هـي قليلـه
خيالة العرفاء على الأرض راسين
ما حدرت بيشه لبيضـاء نثيلـه
حنا هل الردة كعـام المعاديـن
وعند الوثاق أهل الأدى والعقيله
وحنا هل الجيره ربيـع المحازيـن
نفوز لا بـار العميـل بعميلـه
ومثلوثه ابن هميل شيخ المراغيـن
كانت عى غيره شبه مستحيلـه
جزل المقاطع مع ثمار البساتيـن
ودر البكار اللي ترب الخميلـه
في رنيه الفيحاء بـلاد القطانيـن
يدلهـا الناصـي بليـاء دليلـه
من سابع الأجداد توجد لذا الحين
فازوا بها ربعي من الله الفضيلـه
ما دامنا نمشي على الأرض حيين
موجوده طول السنين الطويلـه
عادة لابن قطنان في العسر واللين
وابن مهيد الوائلي هـو زميلـه
اللي يصوت لا غداء الليل ليلين
جهرآ على شان الطراقي تجيلـه
شهره كتبها الله من حظ الإثنيـن
يوم الشدايد والمعـاوش ضئيلـه
من فاز بالعلياء ذكرناه بالزيـن
ما ينسـي لـو يتفافـا رحيلـه
هذا طليعه من خبر عام الألفيـن
تزفها أشواق العلـوم الجزيلـه [/poem
بيض الله وجهك علي هالقصيده