[ابن قطنان1]

.: يـاضـيـق صـدري :.


ياضيـق صـدري كـل مـا هبـت علـي مـن الجنـوب
نسـايـمٍ مـامـلـت طـعـونـي وقـلـبـي مـلّـهـا
وارقـى علـى مرقـاب حزنـي واتـحـرى للـغـروب
وامـسـك جـدايـل هالحـيـاه الـمـدبـره وافـلّـهـا
واشـوف وشلـون الليـال ادور فـي الوقـت اللـعـوب
واجمـع مسائـل هالبـشـر فــي دفـتـري واحلّـهـا
والعن ابو الحـظ الـردي !! واستغفـر المولـى واتـوب
وآقـول يـا ربـي تعيـن اللـي صـبـر ثــم شلّـهـا
ويا سعود قـرب لـي مـدام الوقـت والعمـر محسـوب
واسمـع يـا خـوك ابيـات مـن جوفـي نويـت اتلّهـا
لا صارت الدعوه مابين : ( ضلوع صدري ) و(الهبوب ) !
بقولهـا و : (( اللـي عقـد روووس الحبـال يحلّهـا ))
وش عاد نرجي من زمـن صـارت بـه كبـار الذنـوب
انـك علـى الباطـل سيـوف الحـق تونـي سلّـهـا !!
اسلامك اصبح (( متهـم ! )) والنـور غيّـب ومحجـوب
دروووبهـم يـا كثرهـاا ؟؟ وادروبـنـا يــا قلّـهـا !!
خويّنـا تـصـلاه نــار الكـفـر ونشـوفـه يــذوب
وحنّا نترجى من (( عجوز الغـرب )) ترهـي ظلّهـا !!
لا عادبـه فزعـه ولا غـيـره ؟! وحيلتـنـا يــا دوب
( نشجـب ونستنكـر ) عساهـا تنسـمـع او علّـهـا ..
صـار التنافـس بالطـرب مـن اولويـات الشـعـوب !
(( الغانـيـه صفقلـهـا ؟؟ والراقـصـه طبلّـهـا !! ))
والموضـه تحاصـر تقاليـد العـرب مـن كـل صـوب
تـفــوح دلـتـنـا زعـــل واعـوانـهـم تـزلّـهـا
والكـل منّـا يشـوف نفـسـه بالتـخـاذل مغـصـوب
احلوقـنـا مـاتـت عـطـش ! يالله طلبـتـك بـلّـهـا
يالله ستـرك مـن عـلـومٍ فــي خواطـرنـا تـجـوب
رحـمـاك سهلـهـا عليـنـا دقـهـا مــعٌ جـلّـهـا
ويا سعود اخذها من نمط (حكـيٍ علـى لسـان القلـوب)
اربــع نصـايـح لحيـاتـك يــا عـسـى توصلّـهـا
المرجلـه هـي ( البلـد ) وافعـال يمنـاك ( الـدروب )
والادمــي يـولـد ( غـريـب ) ولاتسـنّـع دلّـهــا
والكايـده تبغـى ولــد مـاهـوب طـمـاع وكــذوب
والـرابـح الـلـي نفـسـه لـربـه قــدر يـذلّـهـا
وتـرى الكـرم عنـد العـرب يغـطـي آلاف العـيـوب
وانـك بخيـل تسـاوي عـيـوب الـعـرب ذي كلّـهـا
واحذر تحسب ان كل بير ابدنيتـك بـه ( مـا ) شـروب
واذا تجـاهـلـت الـعــواذل ابـتـمـوت بـغـلّـهـا
وانــا بــوّدع راس مرقـابـي اذا حــل الـغـروب
وبقـول يـا ربـي تعيـن اللـي صبـر ثـم شلّهـااااا !!

.: لذة صيامي :.


وين اودي وجهي من نفسي ؟! واعديهـا واسامـح
غيمتينٍ ما حفظـت قـدرك وراحـت تمطـرك ؟!
وكيف ابدمح زلتي بـك لا حشـى مانـي بدامـح
دام عطر خيانتـي مـن زود ضعفـي عطـرك !!
صدق ان مرايتي ما عـاد تلقـى بـي ملامـح ؟!
خانها وجهـي تشتـت فـي دروبـك ينطـرك !!
وصدق ان الحزن من لحظه صدفنـي كـان لامـح
في عيوني شـي اعمـق قـال : لابـد اخطـرك
ما هو من طيبـه ولكنـه عـرف هالقلـب جامـح
ما يأثربـه حـزن او خـوف مـا بيـن اسطـرك
يعني بترضى بترضـى دامنـي لرضـاك طامـح
وانت تدري لذة ( صيامي ) اذا جيت ( افطرك !! )
لو عتق ليلـي عيونـي شافـت ان النـوم سامـح
يلزم انعاسي شطاره !! وانت يـا خـي مشطـرك
لا تجاهلنـي طلبتـك ولا انـا مـانـي مسـامـح
غيمتينٍ ما حفظـت قـدرك وراحـت تمطـرك ؟!

.: الدمع :.


الدمـع لا منـه نـزل مـن ناظـرك كنـه :
طفله تسولف للحـزن عـن ثوبهـا البالـي!!
اهديـت عطـرك للغيـاب وقـمـت اباكـنـه
لجل اتنفس بـه ( غـلا ) ثـم ينشـرح بالـي
يـا مـا رجيتـك لا تخلـي غيبـتـك سـنـه
صعبه : اخليني معـك ؟؟ واتركنـي لحالـي!!
والحظ من يومي عرفتـه مـا ضحـك سنـه
حالي زهق من زود ما اشكينـي علـى حالـي
لا تبخـل بدمعـك حبيبـي مـا بـهـا مـنـه
سيّلت في غيابك ( بحر ) ولا نثنى ( جالي ) ؟!
هالرمش تقطفني معـه .. او اقطفـك منـه !!
مليت من قولت : يجي لـي ميـر مـا جالـي
جفن(ن) نفيتـه للسهـر قلـي متـى تحنـه ؟
لا صرت سلطان العيون وحضـرة الوالـي..
لا من ذكرت العقـد.. والسلسـال.. والحنـه
يسوق لي ليلـي طـواري ( مالهـا والـي!!)
المسأله : ماهـي (عنـا) قلبـي معـك عنـه
اغلـب حنيـن المغتـرب للشـارع الخالـي؟!
المسأله : انك موقـف(ن) مالـي مصـد عنـه
لا رضيتبه (عمي) زعل من موقفي (خالي) !!

.: عسفت القلب :.


عسفت القلب عالفرقـى تناهيـد وشقـى واحـزان
وجبرت الصمت ينطقني فراق وخابـت ظنونـك..
ابرحل عن مدى حسك وشوفـك واعلـن النسيـان
مدام ان التعـب علـم عيونـي كيـف يرثونـك!!
تعبت افسـر الموقـف سجيـن ونفسـي السجـان
تعبت اشكي قسى قلبـك وارد اشتـاق لطعونـك!!
تعبت اتجاهل اجروحك واقول اقوى على الكتمـان
وهي اول ما يطريلي لقيـل محمـد .. شلونـك!!
لو اقدر اكتـم اعتابـي واسايـر كذبتـك يافـلان
ما اقدر اكتم الشرهه لجت مـن عينـي لعيونـك!!
ولو اشعل صمتي بجرحي واطفي ثـورة البركـان
ماادفى ونار صمتي بك رماد(ن) ما رضى يخونك؟!
رويت من الظما!! يكفي تعبـت اراقـب الميـزان
لا رجح كفتي ولا انصف ثقل جرحي من جنونك!!
بلاش مـن العنـا والهـم ولوحـه مالهـا عنـوان
رسمها كذبك الجارح بلون(ن) شابـه ل..لونـك!!
مـدام ان الهـوى جنـه حكمهـا بوقتنـا شيطـان
تمكـن فيهـا واستفحـل وغنـى للوفـا دونـك..
ومدام ان العمر يمضي وكل مابـه غـدى خـوان
ابعزف آخـر امالـي علـى ترنيمـه الحونـك..
سوالفنا لمن صرتي حكايـه مـن زمـان(ن) كـان
امانـه لايمـوت الحـق.. امانـه لا ينسّـونـك؟!
ترى ما هي ابد صعبـه يخـون بهالزمـن انسـان
ولكن كيف بحيا كيـف ؟؟ اذا ذكـراك وتخونـك؟!

.: مبروك .. جرحي! :.


اضحك.. وخل البشر من فرحتك تدري
مبروك جرحي.. عساك لطعنتك سالم؟!
لعبتها صح وجبت العيـد بـي بـدري
مولمن سيفك وطبـع الزمـن والـم..
من قبل اعرفك وحظي عادته فقـري!!
من خلقتي معذب ولا انته معي ظالم !!
دام الغدر غربه ودام الوطن صـدري
كم خنجرن للوطن مشتاقـن وحالـم؟؟
لا الليل ليلي و لا ذاك الفجر فجـري
الكل ضدي وانا المبلي وانـا مسالـم..
لا ابنتقم منك ولاني معتـزي بصبـري
من جدك اهتم؟! وانا في حالتي عالم؟!
لا والله اضحك وخل الناس بك تـدري
مبروك جرحي عساك لطعنتك سالـم!!

.: أطهر خطايا الشوق :.


دام عذري اقبح من الذنب فـي عيـن الهـوى
اسجدي يا اطهر خطايا الشوق قدم المغفـره..
واسكبي دمعك مدام الضحك توه مـا ارتـوى
وامشي في درب التواضع كبريـاء وبختـره..
واعلني موت العداله بلحظة(ن) فيهـا استـوى
ذنبي وعذري .. وعشق بظلم.. مامنه ثمـره..
وانت يومنك تصد ولادري قلبك وش نـوى!!
اذكر ان طبعي اجيبـك ضعـف ولا عنتـره..
يا اول احبابي وانا لي قلب عنـك مـا قـوى
لا جرحته ضم جرحك حشمة(ن) لك وشكره!!
يرتجي منك الوصل لوكان وصلك قـد حـوى
هم شيب عين قلبـي وانحنـى منـه ظهـره..
هام بـك حـد الهدايـه لانسـاك ولا نغـوى
صان حبك وانت ادرى ( ائمن الحب اخطره!!)
بنصحك شفت الحكي لافـاق حـد المستـوى
مثل ما جايز يكـون ابـداع جايـز ثرثـره!!
لا يغرك حكي عذالي وانـا اول مـن طـوى
دون كبرك حلم ببقى طول عمـري اذكـره..
وكان ردت للعتاب ومنهـو فينـا اللـي لـوى
ذراع خله بالخطـا حتـى تمـادى وكسـره..
بكتب لفكرك عبـاره وافهـم انـت المحتـوى
فيها بشرح موقفـي واللـي جـرى بفسـره..
الروايـه وش خطـاهـا دام راويـهـا روى
نصها بوقت اعتلـى جهلـك اعالـي منبـره؟!

.: ياغايب :.


قصايدٍ تنكتب في روّعة وصوفـك
في كل خايع فكر تلقى لهـا جِـرّه
والشعر كانه قدر يخطّرك ويطوفك
مـا هـوب لله .. لا درّي ولا درّه
يا غايب ٍ رجّعك عقب البطا خوفك
في كل مره تجي وتعـاود الكـرّه
اتكبّر العذر قبـل اتكثّـر حلوفـك
ولا ضرّ قلبي كبر عذرك ولا سرّه
قلبي نسيته سنه في راحت كفوفـك
طالبك ردّه علي ولاّ اكفنـي شـرّه
الله لا يسامح الاشـواق وطيوفـك
ويا ويل قلبي من الحرمان والحـرّه
يا ليتها في يدّي واغيّـر ظروفـك
او ليتني ما عرفت الحـب بالمـرّه
العام في كل لحظه اقـدر اشوفـك
واليوم ما اقدر اشوفك بالعمر مرّه !

.: الفيصلي :.


ياعين كـن الدمـع مـا عنـه مجنـاب
ولا كـل رجــالٍ فقـدنـاه نبكـيـه
تغورقـي بالمـلـح والمـلـح لا ذاب
المحجر اللـي جـف بيسيـل واديـه
وأن كان حر الدمع ما جـرّح أهـداب
ليه البكـا والحـزن يـا مدمعـي ليـه
ذيب الشقا يقنـب علـى راس مرقـاب
يامصبرين القلـب فـي مـوت غاليـه
الموت نرضابه بـلا شـرح وأسبـاب
نرضـى بحكـم الله ونصبـر وندعيـه
يغفر ذنوب الفيصلـي ستـر وحجـاب
أمـة محـمـد دون شــيٍ تحاتـيـه
يا نجد عم الحـزن وديـان وهضـاب
ويا حجاز كـل جبالـك اليـوم تنعيـه
وحايل كست سلمى من الهـم جلبـاب
وعرر حكت حـزن الشمـال ومعانيـه
ونجران من زود العنـا تفتـح كتـاب
حزن الجنوب وتنقـل أصـدق تعازيـه
وهل الخليج الدمع فـي راس مشعـاب
والبحر الأحمـر كـنّ جـده تواسيـه
وياكويت حزنك غير ومصابك مصـاب
في موت مـن حـرّر قيـودك بأياديـه
اللـي فتـح للفزعـه بيـوت وأبـواب
ولعيون أرض الخير غامـر بأراضيـه
وأنا مابين الحيـره وفقـد الأعصـاب
عجزت لا أكتب بيـت واحـد وأغنيـه
كني من البارح مـن الشعـر مرتـاب
شاعر وفاقدلـه وطـن كيـف يرثيـه
ماهي بلحيـة تعزيـة شعـب أقـراب
لا والله الا كــل مسـلـم نـعـزيـه
هـذا مليـك المجـد فكـاك الأنشـاب
ياقـرب فزعاتـه ومبـعـد هقـاويـه
عـل السحـاب يهـل مـن آب لا آب
علـى قبـر فهـد الجزيـره ويسقيـه
اللي مرض وقلوبنـا حولـه أسـراب
ومـات ودعاوينـا لـربـه تخـاويـه
وسع حرم / طبع كتاب / حارب أرهاب
ومكه وطيبـه تفتخـر فـي مساعيـه
مثلـه يغيبـه القـدر ميـر مـا غـاب
ومثله يموت ولا يمـوت الفخـر فيـه
يا كثر ما راحوا مـع الوقـت غيّـاب
وياقل من باقي علـى الأرض طاريـه
سجّل يا تاريخ الشرف صفحة أعجـاب
للي يعيـش الحاضـر بخيـر ماضيـه
وللمرجلـه موقـف وللنـار شـبـاب
وللحكم أبـو متعـب وأبايـع ويكفيـه
من قبل تعلـن بيعتـه بيـن الأقطـاب
قامـت تبايعـه القـلـوب وتزكـيـه
والجمله اللي ماهـي بحاجـة أعـراب
مـا كـل رجــالٍ فقـدنـاه نبكـيـه

.: أمير القلوب :.


الموت مـوت القلـب ودمـوع الاعيـان
توّصـل الإحسـاس بـأصـدق وسيـلـه
والشعر بـوح الصـدر والشاعـر أحيـان
مايـدري بحزنـه سـوى طـول ليـلـه
ومن طول ليـل البـارح وثقـل الاحـزان
عرفـت وش معنـى اللـيـال الثقيـلـه
ما والله اصعـب مـن شعـورك بفقـدان
الـلـي معلـمـك الحـيـاه الجمـيـلـه
الا انـك تحـاول تترجـم علـى (لسـان
شعـرك) مشاعـرك الجـسـام العليـلـه
وشلون اغنـي لا نشـف ريـق الالحـان
وشلـون ابكـتـب والمعـانـي بخيـلـه
في مـوت اميـر قلـوب ومعلّـم اذهـان
وريـث مـجـد آل الصـبـاح وسليـلـه
مفنّـي حيـاتـه بالمـكـارم والإيـمـان
العـادل اللـي راح مــا بــان ميـلـه
حتـى خبـر موتـه قبـل صـوت الاذان
كـنـه يصحّيـنـا لكـسـب الفضيـلـه
يـا جابـر العثـرات والـدمـع هـتّـان
ليـت الدمـوع تــرد خــل لخليـلـه
يـا سيـدي مـت ومعـك مـات نسيـان
طيبـك وقــدرك والفـعـول الجليـلـه
غبـت وبقيـت لطيبـة القلـب عـنـوان
وغبـت وتركـت الخيـر يفقـد عميـلـه
وغبت وحكت (الابراج) عن حزن (دسمان)
وسيّل دموع (السِيـف) حـزن (المسيلـه)
ورغم اختلاف الشعـب بعـروق واديـان
فـي حــب جـابـر كلبـونـا قبيـلـه
ابـو اليتامـى والأرامــل والإحـسـان
راع الجمـايـل واليمـيـن الطـويـلـه
مـن طيبـه بشعبـه تمنـتـه الاوطــان
يـا كـثـر مــن ودّه بحـاكـم مثيـلـه
وان قارنـوا مـا بيـن ذربيـن الايـمـان
تـفـرق يميـنـه بالعطـايـا الجزيـلـه
ويوم انطعـن مـن كـف غـادر وخـوّان
سـوى السـواه الصعـبـه المستحيـلـه
قـام الشجـاع وعدّهـا كبـوة حـصـان
واحيّـا بلـد كانـت خــراب وقتيـلـه
يـا عـلّ قبـره روض جنـه وبسـتـان
وعسـى كتابـه فــي يميـنـه يشيـلـه
وعسى العوض في أميرنا عالـي الشـان
ويجبـر مصـاب قلوبنـا فــي بديـلـه
ونبايـعـه بالـحـب قـايـد وربّـــان
دام الاصيـلـه للشـيـوخ الاصـيـلـه
وتبقين يا كويـت الرخـا عبـر الازمـان
درة خلـيـج ودار خـيـر وفضـيـلـه

.: اسبـوع :.


اسبوع مرّ..ولا وصل منك مرسـال
ياقوّ قلبـك كيـف تقطعنـي اسبـوع
الجو كافر!وانـت ماترحـم الحـال
وانا عليك مـن الولـه ميـتً جـوع
ياللي غيابك صعب يطري على البـال
تركتنـي ضايق..وحاير..ومفـجـوع
ماكنـي الا:شايـبً فـاقـد عـيـال
وماكنك الا: محـرمً حـق مشـروع
يفوع لك قلبـي ليـا مـر الاطـلال
ياليت مالـي قلـب يشتـاق ويفـوع
حسبي عليك شلون قطعـت الامـال
بآموت لاصار الامل فيـك مقطـوع
ياصاحبـي ماكـل نـزال رحــال
انت الحيّا من وين مارحـت متبـوع
نسيانـي لـزولً بالاعمـاق يختـال
اصعب علي صاحبك من حبة الكـوع
لو الثمن في شوفتـك عمـر رجـال
كان الثمن من يوم ماغابـت مدفـوع
ولو القـدر ماتـم قولـه ليـا قـال
ماضاق صدر ولا انحنى راس مرفوع
ياصاحبي عشقتنـي فعـل وخصـال
وانا عشقتك شعر واحساس واطبـوع
وشلون تتركني كذا لاشهـب الـلال
وقدام عيني تجـف ينبوع....ينبـوع
وانا عشانـك جيـت والغيـم همـال
اسيّـل الوديان...واداحـم جـمـوع
ماردنـي عنـك سواليـف عــذال
تزعل علـي ربوع..وتقـدّر ربـوع
كان المهم اعيشـك جنـون ووصـال
ويكون لي كلمة ولـي راي مسمـوع
واليوم ضاقت بي من الجـال للجـال
فرقاك تقصم ظهر..وتحز...وتلـوع
لو جيت شفت الحال ماسرك الحـال
في غيبتك ضايق..وحاير..ومفجـوع
هذا غياب اسبوع وشلون لـو طـال
طالبك لايطول غيابـك عـن اسبـوع