[ابو ماضي]

بسم الله الرحمن الرحيم

يامناحي انا عيد قلبي وريفـه= ممـشاً معك مـن بد قـاصـي ودانـي
انته ضنين القلب وانته وليفه =واللـي بنـفسك خابـره مـا خفانـي
حقك عليه حت نفسك صخيفه =اطـاوعـك واكـفيك ضيـم الـزمانـي
واعلمك ممشى الدروب الشريفه= وانهاك عن درب الردى والهواني
وانهاك عن طرد العلوم الضعيف= اللــي يرددهـا خـطاة الهدانــي
ترى الفتى لا عز جاره وضيفـه= وقـدم مـواجيبه لمـن جاه عـانـي
وابعد عن المنقود لا شاف شيفه =وسـما بنفسه عن هـزال المـعاني
وعلاقتـه صارت بربه نـظيفـه= وعمل لوجه بالـخفا والـبيانـي
يموت ما حافه من الوقت حيفه= عزيز نفـسٍ دايـمٍ مـا يهانــي
من خاف ربه يمـنه ما يخيفـه= في ساعةٍ يحتاج فيها الامانـي
انا خذيتك مـن فـروعٍ منـيفـة= من روس جدانك طوال اليماني
وسميت بسم اللي فعوله كليفه =عـودٍ علومـه كلبـوها سـمانـي
ذربٍ ليا جات العلوم الطريفه= وصلبٍ ليا شد الحقب والبطاني