[راعي مرات]

قصيدة وردود
كتبت هذه القصيدة وتفضل الأستاذ الشاعر/ فهد محمد الفهيد بمجاراتها وكذلك الشاعر /بدر ابالعون الحربي واعتز بمجاراتهم
-----------


رجاً.. ما مل .. من طول البطا.. ومقابل البيبان@
يبي عله ولو يسمع من اصوات الأمل همسه

وقلبٍ طاح من جور الزمان وقصة الحرمان@
يصبحه الشقا دايم ... ويصافح في المساء خمسه

وحظٍ .. بآخر أيامه عقب ذيك المعزة شان@
ياشين الوقت لامن صارت علومه معك عمسه !

( وكهل الحب) يمشي بالأمل ويدور النسيان@
قتله اللي خذا قلبه معه ... مامرةٍ لمسه !!

وصار يمثل الضحكه ..يخاف يقال له غلطان!!@
يعيش الحاضر بجسمه وفكره غارق بامسه !

وهذا مختصر وضعه.. يعيش بعالم الأحزان@
محى وقته أثر حبه.. وزاد البعد في طمسه

وهو مازال في صمته ... وداخل مهجته بركان@
عسى الله يخرج همومٍ بصدره غيبت شمسه

راعي مرات- عبدالرحمن المجلي
______________________________
مجاراة الشاعر العذب فهد الفهيد
--
طويت رشاي وادري من طويت رشاي كلش بان @
تبين لي حقيقة صورتي اللي شفت منعمسه.
دريت ان الهوى وملاعب الفرحه زمان كان@
مضى واستوطن احلامي خيال مخاصم نفسه
ياكود مفارق ايام الونس والعيش في النسيان@
تعيش بهامش ايامك خيال وارد طمسه.
عقب ما انت الحبيب اللي يعزه جملة الخلان@
نساك الوقت يا مسكين واستثناك من درسه.
غديت بزحمة الايام مالك بينهم عنوان@
غريب الدار تنشد عن مداهيلك وعن رمسه.
الا يا ليت وقت مر بك في سالف الازمان@
يعود يعتذر لك عن بهاذيله وعن وكسه.
جزا الله عن زماني كان مالي في زماني شان@
وجزا الله عن فرحه اللي خذيت وعن غثا عرسه.
( فهد الفهيد)
-----
مجاراة الشاعر المبدع
بدر ابا العون الحربي
---
وإلى ياحظي العاثر عليك الخالق الرحمان @
ترفق بالجريح اللي سرا ليله على جمسه

ادوس البنص لديار الوليف وديرة الخلان @
مدام ان الليالي في ظلام الوقت مندمسه

سحايب خير فوق سدير عدت من ورا بنبان @
يخايلها القصيم هناك واهل وثال ملتمسه

خيالً صبت امطاره على قول البدو ودان @
لك الله والشغايا من مسيل السيل منطمسه

نظر عيني مناظرها وطبيعتها سحر وجنان @
تساوي في نظر عيني جبال الالب والنمسا

يقولون القصيم احيان مامثله واقول احيان @
حرام ان القصيم ابكل حزه حاضره امسه

انا احبه عشان السيل والامطار والهتان@
او انه بس من شان الحلو وحروفه الخمسه

سلام الله على منهو شغل فكري وانا سهران @
عدد ماهو حمس قلبي زمان وجوّد الحمسه

بدر ابالعون الحربي
تحياتي وتقديري