السلام عليكم ورحمة الله
اعتقد مافي احد مايعرف موقعة جوده .. ولا التاريخ راح ينساها لانها من المعارك اللي غيرت مجرى التاريخ وهي تعتبر بداية النهايه للدوله السعوديه الثانيه اللي كانت ماهمها الا العجمان ومحاربتهم . وبدايتها عقب ما حاصروا العجمان الحسا وقام عبدالله بن فيصل باعلان النفير العام في نجد كلها وارسل جيش جرار من بدوان نجد وحضرها بقيادة اخيه محمد بن فيصل لمحاربة العجمان وآل مره ومعهم اخيه سعود بن فيصل اللي كان مع العجمان . ويوم دروا العجمان زحفوا صوب عين جوده لانها طريق جيش عبدالله ولانها ارض السعد.في سنه 1287هـ 1870م. ودارت معركة قويه واستبسل العجمان و وحصدوا جيش عبدالله بن فيصل وذبحوا منهم تسعميه ومن مشاهيريهم مجاهد بن محمد امير الزلفي وابراهيم بن سويد امير جلاجل وعبدالله بن علي آل عبدالرحمن امير ضرما واسر محمد بن فيصل قايد الجيش وارسلوا لسجن القطيف .. وبعد ما دروا هل الحسا والحساويه فتحوا الحسا كلها للعجمان واستسلموا بدون مقاومه .. وعقبها قام عبدالله بن فيصل بعد ما درى بجمع امواله وثروته وهله وترك الرياض وراح صوب ابن رشيد في حايل ..وارسل عبدالعزيز ابابطين الى والي بغداد يطلب منه العون والنصره ..
وفي هذي الموقعه قال شاعــر العجمان . عبلان بن سعد المصراني
يالله يا مدرج الافـلاك فـي ساعـه
رب كريـم جزيـل المـد نثنـي لـه
يوم على جال جوده ترهـق افناعـه
يوم عبوس غشى الصفـرا مخاييلـه
جمع العوارض نطحنا كـن تهزاعـه
سيل تحـدر علـى جـاري مساييلـه
بارودهم في الخضيرا كـن تنيزاعـه
برقه يرفرف حقوق وان درج سيلـه
دفنا لهم من كثيـر المـوت واقناعـه
ماغير قو العزيمـه والظفـر حيلـه
تسع ميـه عسوجـي طايـل باعـه
كن الخشيع الخشـب جثـا رجاجيلـه
وسيوفنا في جماه الـروس قضاعـه
كم جوهـر دمـر وجهـا لنـا خيلـه
وقديمي في الشواكل عـاش صناعـه
ماعاد تجلـى الحـلا منـه صقاقيلـه
ابو هلا شوق مـن خوتـم صباعـه
يزرع ضمير الحشـا لجـة خلاخيلـه
ياشبه عنـز المهـا ماهيـب دناعـه
تزهى من المشخص الغالي مثاقيلـه
ارخى الشنق واهمل اليسرى بمصراعه
لين استداب المطوع وادبـرت خيلـه
خلي المبيرق يـدق الحـزم بكراعـه
والراس فاخت حساب يديـه ورجيلـه
وطالبك صفرا مـن الزلبـات تواعـه
كن زيلها العسو لاهـزت شماشيلـه
تلحـق بعـود قديـم بانـت اوقاعـه
لا من خطو الـردى ماوطـن الزيلـه
(منقول)