[وافي السبـيعي]

نون نشا برقه من البعد قداح= اقبل تمايح به ذواري رياحه
كنه سواد الليل والبرق الاصباح= تجهر حديد الطرف ومضة لماحه
الى نجد منبت كل خير وفواح= شهرين والوسمي يصبح صباحه
في ظل ورف غصونها الورق نواح= وفراشها تفرحك وشمة جناحه
ازكى النفل من نفحته كل سواح= وابكى الزهر طير السحر من نواحه
دموعها طل على الغصن سفاح =والشمس لي شعت تبخر سفاحه
وصار الزهر مابين جاذب ومياح =لي هبت الذعذاع هزت مياحه
وتنكست فيه ام سالم بالاجناح= انغامها تسقي القلوب الفراحه
وراع الربابه حنن القوس بالاح= ماكان في نفسه من الوجد باحه
واودع طيور الروض في همس وافراح= وذوق خلي القلب طعم النياحه
له ونة تطرب واناته انواح =اذكى هوى العشاق هو وش صلاحه
واللي دله من الغي خلاه ينلاح= وراح يتصورله مداوي جراحه
وصار يتمنى لو عشيره معه راح =كف بكف وخطوة في فياحه
وقف وتبسم قال انا خاتمي طاح =ومن الدله ضيعت يمة مطاحه
يالله نعود كود نلقاه ياصاح =اثره نكايه من عجايب مزاحه
وارضاه زهرة قحويان لها انفاح =فيها حكت ومضة ملامح ملاحه
الاصفار اللون صر عنه صفاح =واستبدله لونن يحالي نصاحه
متلثم طرق عفيف له اوشاح =الله لو شوقي نسج مع وشاحه
الليل داكن لكن النجم وضاح =والليلة الغدرا تزيده وضاحه
بذنيه من سحر التعاجيب كالراح= وفي عينه الدنيا تبسم فساحه
قال اهدنا من العيد قال العطا باح= فناظر والى الحنا تعورج براحه
وطاف بخياله من اخضر العمر ضباح= وجادت بعشرات المثايل شحاحه
الشوق لاسرار العشاشيق فضاح= وبراءته سر وجمال افتضاحه
ياحلو لعق الدم من بيض الاجراح= من رمش خافية المنايا رماحه
معشوقتي مرباه في بيض الاصفاح =تناجي وتسقيني الشهد من قحاحه
لي خاطر عن البعض يناح =لخطر ومزهرة الخواطر جناحه
هوتاح لكن رايد الحظ ماتاح =وما حسه الا عقب مااقفى متاحه
مصقول وعقول العباقر لها اقداح= مااروى ولا تعبس مناهل قداحه 3
الجهل بحر عنه الانهار جناح =حي ولكن رمز موته ملاحه
مطامح الاشفاف يشقن الارواح= واشفاف كاسات الشقا انفاح راحه
ماتدرك الا عقب قومه ومطراح= يقرا طلاسم سرها في انطراحه
والقدر لولا صالي النار ما فاح =والنار لولا الزند مااضرم قداحه
من لايشم الهون مافهم الامداح= ومن لا لهم ماذاق طعم الفصاحه
مشكور يادهر هداياه الافداح =الله لو ينشاك كاس الفداحه
الذ من نجوى جلت كل الاتراح =واهنى على كبد الصدي من قراحه
اسبح على موج بلا دسر والواح= والكون في عيني جنان مباحه
ياطير مافي احد الجناحين مفساح= تاخذ كتاب اللي تناهى فزاحه
متضمنن شكوى معانين والماح= منها القلم سقت دموعه طلاحه
لولا النوى ماحن ولف ولا صاح =شر اشر الشر صامت صياحه
في حس عشاق الميامين صداح =وبعطفك يابوتركي سقيته صداحه
فكره تطلسم واثر الصمت مفتاح= بلماح عرفك يستجيب انفتاحه
همي الى زرته عن الصدر ينزاح= واحس للدنيا مذاق وملاحه
معارفه لي الى اعتم الفكر مصباح =حساس عرف اللي عميق نزاحه
يرسم بهاجوسه قبل شوف الاشباح= فراسته تشتم غمض اشتباحه
مخضل بال بالتفائيل نضاح= من عاشره يورق خياله نضاحه
سلي معشر للاسارير مناح= كالشمس تهدي الكون ضي ومناحه
ان جيت في بيته تاديب وامزاح= وان زرت فالمكتب بشاش وسماحه
من منبت بالجود والحب نفاح=كنه من الجنه شرب نخب راحه
منداح عرف لي نزق كل منداح= ثاقب صويب الراي عمدة سلاحه
الى اشفقت نفس اللجد للجد شاح =ماينتبه كود الفكن لانشياحه
نهنيك في ثرات مشرقة الاطلاح =وجناه غرس ممرياة بلاحه
لين اعتمت موحشة الاغوار ضياح= ينور عتيم الكون مشكا ضياحه
البابها منجاع روض ومسراح= دمث الربى تعشق خطاك اندياحه
ماجور ياقلب شدى عذب الاصداح =في سامقة غصنن يداعب جناحه
ملاح وبحور الادب موج ورياح =رضى ضميره والاداب ارتياحه
وترى السفينه لوح والروح ملاح= طاب السفر ياهل السفن والملاحه