بسم الله الرحمن الرحيم
ارسل الشاعر خلف بن محدى ال غبين العنزي من شيوخ الفدعان القصيد الى احمد السعدون رئيس مجلس الامة الكويتي وطلب منه تسليم القصيده للشاعر طلال السعيد اثناء انعقاد المجلس وال غبين هم اصحاب المثل عطية غبيني ما ترد قال
سر ياقلم واكتب تناظيم الالحان= زان المجال وللقوافي كتبنا
اكتب حسس قلب من الغبن حيران= ومن كثر ما تطري طواريه شبنا
قلب معذبني وانا منه سهران= وباسباب ميلات الزمان استصبنا
عبرت ما كنيت يوم الخفى بان= بالشعر يومن حان وقته اجبنا
رد على اللي قال زيف وبهتان =كاذب وحنا نكذبه ما كذبنا
عضو الفلس اصبح مثل طير برمان =والله من موقف طلال اعتجبنا
طلال بن عثمان هايف وغلطان= يمدح وحنا منه ناخذ حزبنا
طلال يامادح زعيم المريكان= عليك نلقي يالمنافق عتبنا
اخطيت مضمون الهدف يابن عثمان =حنا لكل اللي تقوله شجبنا
مدحت بوش وانت مخطي ووهمان =وكذبت في مدحك شذوب شذبنا
وش عاد لو مجدت بالشعر شيطان= مدحت بوش وتسمية بوش غبنا
طلال مجد بوش في نظم قيفان =ونسي مواقفنا وكنه هزبنا
لاشك ما نقبل على النفس خذلان= يوم ان ابن مزعل بشعره لسبنا
والله يالولا اللي لهم قدر وكيان= لا اقول يابعض الرجاجيل طبنا
خسران من يفعل بكم طيب خسران= لو كان من مقطع عصبكم عصبنا
نعم نعم انتم لنا اجوار واخوان =بالدين والا ما حسبكم حسبنا
المدح ما يزهى لكافر وخوان= يزهى على الصنديد مقدم عربنا
فهد صليب الشور خلفت كحيلان= زعيمنا الميمون خلص نشبنا
فهد صليب الشور حماي الاوطان= للعز حنا في وجوده وثبنا
له وقفة تصعب على فلان وفلان =والخير والله في وجوده صحبنا
وطلال يمدح بوش هيف بلا ظنان= يمدح عميل اللي بجيشه حربنا
وباسباب صاحبكم غدى الشمل شتان= وللفهد جيتوا يوم حنا انجذبنا
وبالحال جبنا جيش بوش ومتران= وايضا لقوات التحالف طلبنا
على الطلب جونا سريعين باعلان= ويوم اخطا راي الغير للرائ اصبنا
ما هو غلى جونا مطاميع باثمان= وباسبابكم لهم خسرنا ذهبنا
وايضا خسرنا اشناب في وسط ميدان= وباسبابكم في ازمة الحرب شبنا
والله واللي فارض خمس الاركان= ما تدخل القوات لو ما رغبنا
واليوم تنسون المواقف والاكوان= العام يوم النار تاكل حطبنا
تنسون وقفات الفهد عالي الشان= مع شعب جابر يوم جابر ندبنا
من لاذ في ظل الفهد كايده هان= وجابر زبن يمه من الغبن زبنا
لولا الفهد ما عاد جابر لدسمان= فهد الفهود الوايلي هو جنبنا
ونعم بعبد الله ونايف وسلطان =سلطان زيزوم الحرايب جذبنا
ونعم بزيزوم المناعير سلمان= الصيرمي بحماه محد قربنا
نعم هل العوجا طويلين الايمان= اللي نسبهم من معامق نسبنا
نعم هل العوجا ضريرين الاطعان= اللي بحد السيف هدوا صعبنا
نعم هل العوجا مقاديم الاضعان= قادوا مسيرتنا ولبوا طلبنا
نعم هل العوجا مواريث مرخان= في حبهم رب الخلايق وهبنا
نعم هل العوجا للامجاد عنوان= شيوخ لهم في قمة المجد مبنى
نعم هل العوجا صماصيم شيخان= اخوان نوره من وجبهم وجبنا
حنا سعوديين بالفعل شيخان= وعن دارنا يوم اللقاء ما هربنا
حنا سعوديين كان الطلب حان= عدونا يدرى عواقب غضبنا
حنا سعوديين والفعل برهان= حنا لجار خانكم له ضربنا
حنا سعوديين لا ثار دخان= ومن يلتجي فينا فلا عنه غبنا
حنا سعوديين في وين ماكان= عدونا له المحابل نصبنا
حنا سعوديين في كل الازمان= حنا العرب واصل العرب منتسبنا
حنا سعوديين لنا القوي لان=من اللي غدر فيكم خذينا ندبنا
حنا سعوديين يوم يوم الزمن شان= حنا لكم مع شينة الوقت طبنا
حنا سعوديين بالفعل فرسان= ولازال حنا حماتكم ما انسحبنا
يوم ان هدام العرلاوبه بكم خان= حنا وقفنا دونكم واحتزبنا
حنا فعلنا افعال شوف بالاعيان= وانتم استجبنتوا من الخوف جبنا
ويوم تقهقر بالخطر كل جابان= حنا دحمنا للخطر واقتربنا
جيتوا لنا من الضيم تشكون الاحزان= تبكون هدام العروبه سلبنا
واليوم بادرتوا هل الطيب جحدان= وليا حسبتوا غيرنا ما حسبنا
وعدنا الكويت وعاد دسمان فرحان= وفي عودة الدير تحقق طربنا
ولا فيه شكر 0000 ولا فيه عرفان =وحنا تعبنا من سببكم تعبنا
والله من ينكر هل الطيب حيوان= والسب ماهو من طبايع ادبنا
قلته وانا من ديرة عزها يصان= ياعز من حنا بجنبه حضبنا
وصلاة ربي عد هتاف الامزان =على الرسول اعداد ماارمش هدبنا
الاستاذالقدير/مسلط
بيض الله وجهك على النقل الرائع وصح لسان الشاعر/العنزي وبيض الله وجهه.
اما الدعي طلال السعيد فنقول له:
وان انت اكرمت الكريم ملكته= وان انت اكرمت اللئيم تمردا