اخواني وبني عمي اعضاء منتديات سبيع ، هذه محاوره او مجاراه بيني وبين احد ابناء العم من قبيلة السوده وحبيت آخذ رايكم فيها ..
يقول محمد بن سلطان :
يا محمد يا عويني أشهد إنّ الليل طال = والسهر اتعب عيوني ما عطاني اي مجال
قلت له ابعد وخلني لا يجي فيها انفعال =هذه الدنيا تميل ابنا وحنا غافلــــــــــين
السويدي :
يامحمد ياعضيدي ويش فيه وويش صار=اختصر قلي تراني ماحتمل اي انتظار
لاتضيق ابك الهموم ولايصيبك انحسار=هذه الدنيا تميل ابنا وحنا غافلــــــــــين
محمد بن سلطان :
يالسويدي مدري والله ويش اخلي ويش اقول = والهموم اللي تزايد شي عرض وشي طول
يابن عمي زاد همي بعد هالمهره الجفــــول =هذه الدنيا تميل ابنا وحنا غافليـــــــــــــن
السويدي :
ياالسبيعي لايصيبك جرح ولاتشكي الهموم = آمر وحنا لاجل عيونك نفز ونقوم
وصّف اللي صوّبتك وابشر بنصر محتوم=هذه الدنيا تميل ابنا وحنا غافليـــــــــــــن
محمد بن سلطان :
قدّ هَايـِف والشفايـِف والبَلا فـ دعجَ العيون = وشعر(ن) اعتم ما تلملم طاح من فوق المتون
ريق(ن) اعذب للمعذب هو شفى كل الطعون = هذه الدنيا تميل ابنا وحنا غافليــــــــــــن
السويدي :
ويل ويلي سود ليلي من وصوفك يالصحيب = الهوى ماله دوا ولا يفيد ابه الطبيب
طول ليـلـك عزتيـلك من فـراقـك للحبيب=هذه الدنيا تميل ابنا وحنا غافليــــــــــــن
محمد بن سلطان :
سمّ حالي .. عِزّتالي بـِعد مَخضوبَ الكفـــوف = هو خيال(ن) او محال(ن) ماله مثل(ن) بالوصوف
ويل قلبي هو لعبّي ويل حالي من الهنــوف = هذه الدنيا تميل ابنا وحنا غافلــــــــــــــــــــين
السويدي:
يالسبيعي لاتضيعي والهوى ماله امان = انتبه لاتشتبه لاتنجرف صوب الحنان
ابن عمك قبل منّك قد غدابه من زمان = هذه الدنيا تميل ابنا وحنا غافلـــــين
محمد بن سلطان :
يابن عَمِّي لا تِلِمنِي فـْ حِبّ رَعبوب(ن) صغير =هو عذابي من غدى بي صرت انا وضعي خطير
يالله سترك هذا عبدك صادق(ن) بك يستجير = هذه الدنيا تميل ابنا وحنا غافلــــــــــــــــــــين
السويدي :
لاتصيـح يالجريـح ولاتنادي ياسـبيع=الهوى مثل البحر من غطبه لازم يضيع
ليتني اقدر ولكن فـ الحقيقه ماستطيع =هذه الدنيا تميل ابنا وحنا غافليــــن
محمد بن سلطان :
من هوازن نسل عامر هذا حنّا يا سبيـــع = فالملاقا ما انتوانا خصمنا دايم صريع
أنت فزعه وانت عزوه يا محمد يالشجيع = هذه الدنيا تميل ابنا وحنا غافلـــــين
السويدي :
لاجت الدعوه حروب انا لك الدرع المنيع = درع ياقا في الملاقا صدر ربعه مايطيع
مير حبك بيد ربك وحده اللي يستطيع = هذه الدنيا تميل ابنا وحنا غافلـــــين
محمد بن سلطان :
كفو والله يا محمد يالسنافي يالأصيــــــــــــل = يا سنادي للمعادي وقفتك تشفي الغليل
ادعي ربي يستجب لي ويرزقك عمر(ن) طويل = هذه الدنيا تميل ابنا وحنا غافلـــــــيــــن
السويدي:
يارفيقي لاتضيقي والهوى طبعه عذاب = والسبيعي مايطيعي للمصاعب مايهاب
عز غلبا مايوطّى سامي ٍ فوق السحاب = هذه الدنيا تميل ابنا وحنا غافلـــــــيــــن
محمد بن سلطان :
ما اضيقي يا رفيقي و خالقي ربّ العبـــــــاد = هو حسيبي ما يخيبي من لجا به في الشداد
مخلص(ن) له طايع(ن) له في قعادي والهجاد=هذه الدنيا تميل ابنا وحنا غافلـــــــــــــــين
تقبلوا تحياتي جميعا ،،
اخوكم
محمد بن سلطان الثوري