الله يبشر راعي الحفل بالخير=أنا أشهد إنه يستحق البشارة
دعوة طويل العمر تشريف لاغير=مادونها الموتر يغير مساره
نيسان يسوى بنز تسعة مواطير=نذر ان يقطّع دونكم كل أشارة
تفداك ياعساف طول المشاوير=لو انتحاشر عشرةٍ في الغمارة
ولو بوش النيسان سقنا المظاهير=فالمزودة دلة وبن وغظارة
دامك غمزت بهاتفك عشر أزارير=وسمعتني لاهنت ذيك العبارة
يوم الخميس اللي مضى حزة عصير=ما اطيبك ياليل الخميس ونهاره
فأن كان ماوجبت حشمه وتقدير=يومٍ بقالي من حياتي خسارة
لو ينكسر عرقوب رجلي وأنا اسير=وتقفاه كسرة عظمةٍ في الفقارة
ويكتب لي الدكتور عشرين تقرير=لانطلبها وانا اعتزيبك ياسارة
ما انحى وانا عريمان لو شير ماشير=لامشي واريح بين تارة وتارة
الله ولا ياناس بعض المعاذير =أخير من عذرٍ يطول اختصاره
الحلم واضح مايبا الحلم تفسير=حفلٍ يلم سبيع نعمر جداره
لفيت من ديرة ولد راشد كوير=اللي بها مترك أمير الأمارة
احمل تحايا عيد شيبان وامير=من طيبهم شبيت ضو المنارة
سلام يااهل الدار من دون تقصير=سلامٍ أحلى من غدير القرارة
يمشي عليكم عود شبان وصغير =ومن لاحضر يقرع جرس باب داره
والجندي اللي في العمل صوب خرخير=عداه سجن من اللوا والخفارة
ياسبيع جيناكم نزف التباشير=نحمل هدف(لا.للتعنصر) شعاره
حنا لكم وقت الرخاء والمعاسير= وانتو لنا وقت الرخا وانكساره
حنا خلف لاهل السيوف البواتير=قومٍ لهم فالمجد غارة وغارة
مركاضنا يشبعبه الذيب والطير=وعند اللقا نركز ثلاثين شارة
الراي واحد والسرايا طوابير=حقٍ علينا الزرع نجني ثماره
السلم لايطرأ على السلم تغيير=أصحى تغيرنا سلوم الحضارة
الثوب تكمل لبسته بالازارير=ولا ينلبس ثوبٍ تقطع زراره
نمشي تحت حكم القضا والمقادير=ومن يضمن الحجاج يرمي جماره
لو حسب الرجال كثر المخاسير=ماطال عليا لو يطول انتظاره
لاصار ماورد على جمة البير=يصبر على طول الشقا والمرارة
ولو كان خاوى طيبين الصقاقير=مايلحق الصيدة غشيم الصقارة
عسى تعم الدار مزنٍ مزابير=وعسى السعد يضفي علينا ستاره
وختامها جينالكم دون تاخير=وانتو عليكم دين رد الزيارة
صح لسان ابومقعد
على هالقصيده الجزله
وعساف يستاهل المدح