[جابر الجهني]

المشاركة الأصلية كتبت بواسطة الفتى منصور

مشكور يا اخ جابر على هذا الموضوع
وفيه مثل مشهور يقول (جهينه والقوم الشينه) ولا اعرف قصته او معناه بالضبط,, اذا كان عندك خلفية عن ذلك ارجو ان تفيدنا..
..ودمت بود..

العفو يالذيب..


المثل اللي ذكرته ينطق على حالين.. ومعناه واحد..


جهينة والقومه الشينه << وهذا اكثر دقه ..


جهينه والقوم الشينه << وهذا الاكثر شيوعاً..



مافيه سالفه معينه للمثل هذا..

لكنه اطلق على القبيله لفعايلها بالوقعات والمعارك..

ولأنها اذا قامت على احد نسفته عن بكرة ابيه..


وافعالهم كثيره ومعروفه..

لا بالوقعات والمعارك .. ولا بعلوم المرجله والطيبه والكرم..

ورجالاتها مشهورين..

منهم مطرح العمايم ( العمامه : الشماغ او الغتره )

وفخذه فايدي .. كان اذا ضرب بالسيف ما يضرب الا على الراس ويطيح الراس مع العمامه<< هذا سبب تسميته..


ومنهم احد اجدادي واسمه فضل العلوني..

وصارت له سالفه مع شخص من قبيله مجاوره.. وحصل انه رمى جدي بمقمع ( سلاح قديم ) وماكان بالسلاح الا بارود .. وحرق جزء من وجهه.. ونحاش هالرجال..

وكان السلاح نادر بذاك الوقت .. واخذ فضل سيفه وراح يدوره .. وصادفه بخلا.. ومسكه وقطع يديه ورجليه وخلاه ورجع قال لاهله : شوفوا فلان غرقان بدمه بالمكان الفلااني..


وذكر صديق لي ( مطيري ) ان جده لا بغا يدعي عليه قاله : قامت عليك جهينه..


وعرفت بالصدفه ان بالكويت لا بغوا يدعون على شخص قالوله: الله يوديك جهينه ..


وحصلت سالفه لشايب من شيباننا..

قال كنت مسافر على السياره.. وبغيت اوقف لحاجه معينه وجنبت عن الخط..

وانا نازل من السياره .. سمعت رجال يرعى غنم يقول جهينه والقوم الشينه ويرددها بصوت عالي..

يقول الجهني: امتلكني الفضول وقلت بسأله وش يعرف عن جهينه..
وقلت له : يا ابن الاجواد وش هم جهينه اللي تقول عنهم قوم شينه؟؟

قال الراعي: يا رجال هذول ماهم بشر.. هذول ناس تاكل الاوادم.. الله يكفيك شرهم..

يقول الجهني: مسكت الضحكه .. وقلت له : لو اقولك اني جهني وش تقول؟؟

فز الراعي وقال: اسألك بالله انت جهني؟

قال الجهني: ايه جهني.

قال الراعي: بسم الله .. ما كنت احسبهم اوادم.. من اللي سمعته عنهم..!





وهذا المثل يفتخر به افراد القبيله وليس مذمه كما يعتقد بعض نقصاء العقول الذين لم يفهموا المراد منه..




وفيه مثل آخر فريد من نوعه وفيه نوع من الطرافه..


(( هنيّ ومشعاب جهني ))

يقال للشخص عندما يشبع خخخخخخ

وسر ذكر المشعاب بالمثل لأنه في فترة ماضيه تكاد لا ترى جهني الا ويحمل بيده ( دمسه ) مشعاب.. ان وقعت على راس احد ما عين خير..

فكان سلاح جيد وسهل الحمل لكل أفراد القبيله..




شكراً جزيلاً على مرورك الطيب..

وشكر آخر لك على سؤالك الذي اعطاني الفرصه لتفسير هذا المثل..

تحياتي لك