بسم الله الرحمن الرحيم
اخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : هذه مفخرة من مفاخر قبيلة سبيع بن عامر الغلباء مع إخوانهم وجيرانهم وعوانيهم قبيلة قحطان العريقة غلابة حيث الجوار والمعزة ومواقف الشهامة والشيم والعفو ومكارم الأخلاق . والشيخ / فهد بن فراج بن دهيم العزة السبيعي يضرب المثل في موقف العفو والصفح عن جاره والذي يعتبر من شيم الرجال ومفاخرهم مع جاره / عبدالله بن علي القحطاني ولا شك بأن العزة أهل المجد والطيب وهم مفخرة لقبيلة سبيع الغلباء وقد مدح قبيلة سبيع الغلباء وابنها البار الشيخ / فهد بن فراج بن دهيم العزة السبيعي الشاعر الكبير / عبدالله بن حمير الدوسري صح لسانه بقصيدة عصماء يقول فيها :
ما أقوم الشعر وأنشا نو ودانه= وألقح سحابه ببرق زلزل رعوده
أمطر بعذب البيوت اللي لها خانه= في واجب هزني فعله ومقصوده
شاده وأجاده كريم ربنا عانه =عفو عن النفس جود كالجبل جوده
من نادر وفقه بالعفو سلطانه =تنازل عن زلة ما هي بمقصوده
شهم عفى عن ولد جاره ولا هانه= يا جعل في الجنة الخضراء نزل عوده
عزالله إنه رفع عند العرب شانه= رفعة فخر نالها المنعور من فوده
متحمل ضيمها من قوة إيمانه =كضم على غيضها من عادة اجدوده
وأفرح بها جاره نعم الذرب واحسانه =وخفف مصيبة وهي كالنار موقوده
الحي بالحاير نومس كل سكانه =في بادرة نادرة ما هي بمعهوده
لله جلل بها ربعه وخلانه= والطيب من الطيب ذا حقه ومردوده
فالجود بين عريب الساس برهانه= وادروبه من رادها بالجود ممدوده
فهد السبيعي إلى من شام عن دانه= ما والله له ضايم وسبيع زنوده
أدى حقوق الجوار برفعة إنسانه =يتبع وصاة النبي في الجار وابنوده
ما هو بعيب شجاعة منطق لسانه= بالعفو لكن شرف يمتاح بحدوده
يفوزبه طايل ما دامت أزمانه= فخر يماري به كل العالم شهوده
جدد سلوم العرب واسلوم جدانه= اللي فعايلهم في التاريخ مرصوده
والعفو فتح لكل الناس بيبانه =ما هي بمن راد للناموس مردوده
طبق فعول مضت من مثل جيرانه =بين المهادي وجاره صارت شهوده
فهد سماح وذرب طاع رحمانه =كسب ثناها مع أجر فاز بردوده
فلو ارتكز بالقضاء في الربع شيطانه= تفارقوا فرقة ما هي بمحموده
لا شك طفى السبيعي ضو نيرانه= حب لحفظ الجوار سنين معدوده
أخذ العوض فالله وولد الجار ما دانه =خلاه حر طليق وأطلق قيوده
ما هي غريبه على فهد وعفوانه =من قوم في نيلة الطالات محسوده
سبيع في الحرب هم لطمه وفرسانه =وفي السلم هم من رجال العقل وافهوده
سبيع عامر هل الفزعات والعانه= يا سعد منهم بيوم العجه اعضوده
خيالة الغلباء إلى من ثار دخانه =مثل البحر لا تلاطم فجر اسدوده
وفي الجود هم منتدى للجود ظفرانه= جيرانهم ما شكوا من الضيم وانكوده
أمدح على فعل لا جاء الصدق بيانه =وانفال كل العرب ما هي بمجحوده
وقد قال الشاعر الشيخ / سحمان بن ملحم العزة السبيعي بهذه المناسبة :
يا سبيع في في كل المنازل والأوطان
= من الكويت إلـى جنـوب الجزيـره
نهدي لكم فعـل مـن سنيـن ما كـان
= فعل حصل من عقب قصـه وسيـره
فعل حصل قبل أمس في قصر سلمان
= ابن دهيـم أعتـق وحـرر قصيـره
هذا وتفصيل الخبـر عنـد قحطـان
= اللي لهـم معكـم سوالـف وجيـره
ورد عليه الشاعر / منير بن مسفر الثوري السبيعي بالأبيات التالية :
لا هنت واللي سطر الفعل ما هـان
= وما هان من فعله عجز عنه غيـره
ابن دهيم اللي له الطيـب عنـوان
= اللي عفا عن جار بيتـه وأسيـره
والطيـب ما نستغربـه يا كحيـلان
= عاداتنا يا شيـخ فـي كـل ديـره
واسلم وسلم لي على الشيخ سحمان
= راع الفعـول الطيبـات الشهيـره
ويقول الشاعر / عبدالله بن سعد الحضبي السبيعي بهذه المناسبة :
افخروا يا سبيع في ما فعل ذرب اليميـن
= سجل التاريخ له سالفه عنـد قحطـان
عز جاره وأعتقه كاسـب دنيـا وديـن
= بيض الله وجه من حط له علـم وبيـان
نال في الموقف جزا الصابرين الغانمين
= وفاز بالمعروف والطيب في هذا الزمان
وهذا الفعل من مكارم الأخلاق التي حث عليها شرعنا الحنيف وفيه من السؤدد والمجد لقبيلة سبيع بن عامر الغلباء مع جيرانهم قبيلة قحطان العزيزة غلابة ما لا يحصى ويستاهل راع الفعل الطيب الشيخ / فهد بن فراج بن دهيم العزة السبيعي وفقه الله وحفظه وجعلها في ميزان حسناته يوم لا ينفع مال ولا بنون إلا من أتى الله بقلب سليم . منقول بتصرف وأنتم سالمون وغانمون والسلام .