[خيَّال الغلباء]

بسم الله الرحمن الرحيم

الملحمة الزائدية للشاعر الأمير / محمد بن أحمد السديري رحمه الله وأسكنه فسيح جناته :

عفا الله عن قلب يزيد عناه = وداعي غرامه للغرام دعاه
ما طاع عذالٍ يعذله من الملا=وإن سمع عذاله يزيد عناه
إلى توسع خاطره ربع ساعه=على الضيق داكوك الهموم نحاه
قلب براه مجادل الضيم والعنا=الضيم من بين الضلوع براه
دع القلب يا عذّال خله بغايته=هواك ما يتبع طريق هواه
دع القلب يا عاذل عذلك يضره=يزيد يا عاذل عليه شقاه
كونه الأيام لين أوجعنه=وعزي لمن حر الزمان كواه
يكويه من هجر النيا حامي الطنا=يضيق به مما دهاه حشاه
يحن حنات الخلوج لجنينها=والخلج مفهوم تحن ظناه
ما حزنها حزنه ولا ربع ما به=وحياة من نشّا السحاب بماه
على جادلٍ ما شافت العين مثلها=أحيا بذكرى من هويت لقاه
عشيري شرابي من مناظيم مبسمه=يجلا عن القلب الدريك ظماه
أداريه عن شيىء يحسه ويغضبه=وإلى زعل يصعب على إرضاه
إن دك بي من حامى البين هاجس=وجرعت من حر الغرام طناه
تذكرت من طلابة الجود نادر=رفيع الذرا عسر الدروب مشاه
مشى بدرب المجد والنفس تدفعه=إلى شــامخ عسر الدروب سناه
خالد سنام الطايلات بن فيصل=حجا من لجا به والزمان وطاه
أبشكي على فرز الوغى جاير الهوى=شطون الشفاوي والشفاوي تاه
قد تاه ببحور الغرام المظلمه=دليل الخطا عن من يريد نحاه
نحاه عن حي يوده من الملا =وما فات من يومٍ يزيد غلاه
غلاه في قلبي تجدد علايمه=وتكتب على القلب الدريك أسماه
أسماه وإن عرضت مع الناس صفقت=محاني فؤادى والحبيب رماه
رماه بسهوم المحاجر وجندله=قليل الفزع ظلم الحبيب دهاه
دهاه بالفرقا وقلبي له انتمى=يتله ومن بين الظلوع لواه
لواه يوم إنه على الحب يلتوي=ومن دينه دين الجميل أوفاه
أوفيه بالروح العزيزه ولو غلت=روح تبي روح تحب جزاه
أجزاه لو إنه رماني وجادني=يمحا خطا الغالي عظيم إرضاه
إرضاه يبهج خاطري عقب ضيقته=ويرتاح قلب بالفؤاد فراه
فراه في وسط المحاني وعذبه=وإن عذبه سهل عليه إدواه
دواه عنده سبايب مصايبه=وإشفاه من كوثر نظيم شفاه
أرجيه لو دونه من الناس حاسد=رجاي بالله ما قطعت رجاه
أرجيه لو دونه جموع تصدني=وحبل الرجا يضفي عليّ رشاه
وقد قيل للعراف في ماضي مضى=هذا لهذا من هذاك رواه
يمنى بلا يسرى قليلٍ حصيلها=ورجلٍ بلا ربع يخاف إعداه
ما أهبلك يا باغي من النذل فزعه=رجواك من عند الجبان سفاه
رفيق الرخا ينسى مودة رفيقه=ليا ضاق به شين الزمان نحاه
عوين الدهر ما يامن الجار جانبه=وليا عرض للشامتين شناه
على داره السودا تبني خيامها=عوين الدهر شين السواد غشاه
خذ يا لبيب القلب مني وصيه=حميدان في ماضي الزمان لقاه
إختر من الخلان حي توده=تسبق على فعل الجميل يداه
دليل على العليا بعيد من الخطا=الطيب في دنيا الحياة مناه
ما جال في قلبه من الخوف جايل=وإن كاد مرقا الطايلات رقاه
ولا ضعّف النفس العزيزه لجارته=ولا هرولت للمحصنات إخطاه
يفرح به العاني ليا حده القصا=وللضيف معسول الكلام نباه
وإن جاك من يمة معاديك ريبه=من قبل ما تاطا عليه وطاه
صديقك صديق له وضدك يضده=وعلى روس عدوانك تدير رحاه
هذاك حطه لك رفيق موالى=عونك ليا زاد الزمان بلاه
ما يفصل القالات إلا رجالها=ولا كل من شيد بناه حماه
ولا كل من ركب الجواد عدابها=على حامي الهيجا وحر لظاه
ولا كل من نوى لدار رحل لها=يموت ما لحق هواه إمناه
ولا كل من رام المراجل ينولها=يا عسر مقضبها على يمناه
ولا كل من ركب المطايا غزابها=ولا كل من رام الغريم قواه
ولا كل من يبرم عهود وفابها=يطغى على فعل الجميل رداه
ولا كل من ودع لسر يصونه=وكم واحدٍ سر الصديق أبداه
ولا كل من حصل حلالٍ صخابه=يبين بالوقت الشديد صخاه
ولا كل من جالس هل العلم عالم=وكم عالمٍ ضر العباد خطاه
ولا كل من ناله جميلٍ يرده=ولا كل من شاف الحريب نصاه
ولا كل من سل السنان سطى به=يموت وسنانه جضيع إخباه
يا ناشدٍ عني وأنا لي قبيله=لها المجد زايد بالرفاع بناه
وكمل مقام المجد عامر وشيده=طريق المعالي للدخيل مشاه
كونٍ جرى على واضح النقا=الأشراف جضت من عظيم بلاه
مزنٍ تزبر فـوق سلـي صواعقـه =تشظّف مـن خشـوم الجبـال حصـاه
نشا من ثنايا بـرك ترعـد مخايلـه = مـن الشـرق غيـظ بالصـدور حـداه
غيظ مخيف يطحن الغيظ والغضب=وما طال من روس الخشوم طماه
أمطر على الأشراف وانهل وبله=عليهم تنثر بالغزير طماه
قوز الشريف أكبر علايم دلايله=سيله تدفق هد كل انياه
سيله عجاج الخيل والبيض والقنا=وروس النشاما بالحزوم إغثاه
تشهد على ما قلته العامريه=جضت سبيع من عويل ابكاه
تبكي على فتخان الأيمـان غلمـه =تعشوهـم اللـي بالحـروب اعـصـاه
والضبعة العرجا تعشا بدربهم=وكم ضيفوا ذيب يجر إعواه
والطير يلقى البر من ضرب شلفهم=مضاريبهم يعيي الطبيب إدواه
وش حل بالأشراف غالب وراجح=أقفوا كما صيد حدته إضراه
أقفوا على قب تخافق مع الوطا=تنازا بطوعات الرقاب حذاه
من ولب عطبين الهوايا آل زايد=لهم صانع السيف الصقيل حناه
حناه وأرهف شذرته يوم كمله=وعطاه لمن هم بالحروب إعداه
حيث أنهم يروون حده من العدا=بأيمانهم روس الفهود عشاه
إلى عدا فيهم حريب وزارهم=يعدلون بحدود السيوف صغاه
وجريس ما طاله من الظيم طايل=أسود الشرى عمن يبيه حجاه
أسود الشرى بالضيق تنجي دخيلهم=ويروون من دم الرقاب ظماه
فكوه ثم أغنوه يوم إنه إلتجا=وجه ابن بدران يزيد ضياه
تجمل مع جريس اليماني وعزه=الزايدي يوم الدخيل عداه
يشهد لعامر ما مضى من فعايله=يوم إن غالب بالجموع نصاه
يبي دخيل البيت ما خاف خالقه=دخيل عطبين السهوم إرماه
واقفا ذليل يتبع السير بالسرا=وحرب عنى له بالفؤاد شكاه
أقفى مثل ما جاء وهو يشكي العمى=أقفى من الذله يجر قناه
عيب على مثله ليا هد ينثني=يبدل من عقب الهدير إرغاه
وابن صباح أذروه وابن خليفة=رمح آل زايد ظلهم بافياه
أخذ ثارهم من ضدهم يوم كادهم=رمح من العز القديم عصاه
يشهد به الهدار واللى جرابه=دخيلهم ثاره عطوه إقضاه
فكوا حقوق للدخيل ابن وايل=جميلية نالوا حقوق وجاه
من ضرب من لا صددوا عن حريبهم=يصكون باجباه الخصيم جباه
دخيلهم بأعلى السماكين منزله=له بين نجم الفرقدين متاه
كنه بجنات تظله غصونها=والنايف الطايل يحل رباه
تعلوا لعرش المجد من قو عزمهم=مصابيح ظلمات تريح رجاه
مراجيم عدوان مرابيع ملتجى=ليا جف من وبل المزون ثراه
إلى قطبت عسر السنين وجذبت=ولا عاد يذكر بالرياض كماه
يهوشون بوجيه تكاشف من النقا=والضيف ما يقصر عليه إقراه
يا ناشد عني وأنا لي قبيله=قصر الندا زادوا عليه إبناه
أشادوا فعول بالفضايل وسلمهم=للجار كل باللسان حكاه
بني زايد أدوا جارهم من جداره=ولا أحدٍ من أسباب الإله وداه
لهم وادي سهل الدروب ودونه=نار ينزح عن احماه سناه
سناه مصقول الحديد الصافي=وعزم القلوب الساطيات لظاه
عذروبهم للضيف ترخص نفوسهم=والجار مضمون السلام إغطاه
وجه الندا يندا كما ماطر الحيا=يبين عند الموجبات نداه
تعييي على الشيمات حفاظة الشيم=ووجيه الندا لازم يبش حياه
قصيرهم يارد على العد قبلهم=ولا شكا يوم الورود ظماه
إن زادت إسنينه تجدد معزته=وكلٍ خطا جاره عليه رفاه
وإن ذبح خير عند وجهه=وكسب الفضيله بالحيلة إمناه
على الطيب شبان وشيب تزاحموا=والطيب يتعب للرجال مداه
دواسر كنيوا على دوسر الفحل=واسمٍ على فعل يبين إقداه
من الهضب للأفلاج مكدين ضدهم=وحريبهم مر المذاق عشاه
وادي العقيق مطهرينن جنابه=ولا ديس بين العالمين إحماه
من عصر ابن بدران هذي ديارهم=والدار محدٍ للخصيم عطاه
راسين مثل جبال هضب آل زايد=وهم ليا شان الزمان إحماه
حموه يوم إن القنا يقرع القنا=ولمثلهم رب العباد بناه
من الفرعة العليا إلى الخرج حدهم =بـه الجـار مـا كِّـدر عليـه صـفـاه
الدار ما تصلح لمن لا يصونها=الدار عوره والرجال إرداه
دارٍ خذوها بالمراهيف عنوه=وهم نورها الساطع ينير ضياه
بني عقيل أخلو مغاني ديارهم=بعد دمهم بأرض العقيق سقاه
من غلمة ما باعوا العز والشرف=يوم الردي فعل الجميل نساه
تشهد مشاريف اليمامه بفعلهم=فعل تعدى العالمين ثناه
هرج بفعل يشبه الماس بالذهب=وهرج بلا فعل يقال سفاه
نعد قول ما تكذب مثايله=راوّيه أصدق من طيور قطاه
نعد مجد الطيبين وفعلهم=وأذكار فعل الطيبين طراه
فعلٍ على فعلٍ تحاكى بـه العـرب =مجـدٍ يـكـذب مــن يـعـد ثـنـاه
من رام فعل الغانمين وشانهم=السيف يروى من عداه شباه
من رام فعل الغانمين وسلمهم=الجار عن الخصم العظيم وقاه
من رام فعل الطيبين وقدرهم=يبذل ليا ضاق الزمان قضاه
إن كف همال الحيا وأمحل الوطا=وشحشح عن الطفل الرضيع غذاه
يكرم ليا ضاقت على الناس وأمحلوا=ويصبر ليا من الزمان وطاه
النذل ما يقدر على طيب الثنا=والليل ما يشبه صدوق ضحاه
يجود الفتى بالجود من زايد الحيا=يخاف من العايبات قضاه
قولوا لطلاب الثنا يتبع النقا=ولا يلحق العرض النزيه شناه
ومن سار بدروب الردى زاره الخنا=ويلبس من أسلاب السواد كساه
أبعد عن الأنذال واترك ديارهم=يفكك من الوجه الخبيث نياه
الأجواد آيات الندى في وجيهها=والأنذال شري ما يذاق جناه
الأجواد ما تنوي بك البوق والردى=والأنذال عيب ما يعد غياه
الأجواد فعل الخير لذة نفوسهم=والأنذال ملزوم يشاف خناه
الأجواد جنات تعاقب انهورها=والأنذال صلدا من صخور صفاه
الأجواد تاصف لك طريق يدلك=والأنذال لعسرات الدروب إقداه
الأجواد مثل الورد عطر روايحه=والأنذال زقومٍ يطير سفاه
الأجواد فيهم باب يسر ومعزه=والأنذال عسرٍ ما عليه شفاه
الأجواد زلة جارهم يدمحونها=والأنذال تجزا الأقربين جناه
الأجواد مثل النهر حلو شرابه=والأنذال صباخٍ ملاح ماه
الأجواد تبذل فضلها دون عرضها=والأنذال دنسين العروض عراه
الأجواد مثل الريف سعد سعوده=والأنذال قحط الزمهرير شتاه
الأجواد تامن شرهم وأنت عندهم=والأنذال شر ما يطيب بلاه
الأجواد مثل الصبح تمشي بنوره=والأنذال ليلٍ مظلمٍ ممساه
الأجواد حبات الندى يبذرونها=والأنذال تبذر بالرخيص ارياه
الأجواد فعول الخير ما يجحدونها=والأنذال حزم ما يطيب حفاه
الأجواد ما تلحق عزيز مذمه=والأنذال تنطق بالصديق زراه
الأجواد عز الجار والضيف سلمهم=والأنذال بعيون العزيز قذاه
من طاوع النفس الذليله على الردى=يرخص ويظهر للرجال خفاه
من طاوع النفس الذليله على الردى=نسى الجار والضيف العزيز جفاه
من طاوع النفس الذليله على الردى=تقصر عن العز الرفيع إخطاه
يموت طلاب التماني على الشقا=سراب دو والظلال غطاه
يموت طلاب التماني بحسرته=وكثر التماني ما تعيد صباه
يموت طلاب التماني ومثله=من يرجي الحنظل يزين نماه
يموت طلاب التمانـي ومكسبـه =كمـا صايـحٍ صوتـه يـرد صــداه
أبا التماني لا تمنى وخلها=ترى التماني والحلوم أشباه
يقولها لك من هوى القلب عذبه=وداعي غرامه للغرام دعاه

رحم الله الشاعر الأمير / محمد بن أحمد السديري وأسكن أبا زيد فسيح جناته منقول وأنتم سالمون وغانمون والسلام .