رد : يا جر قلبي جر لدن الغصوني = غصون سدر جرها السيل جرا
كُتب : [ 18 - 06 - 2008 ]
بسم الله الرحمن الرحيم
قصيده للشاعر / دخيل الله بن عبدالله الدجيما رحمه الله يقول فيها :
يا جر قلبي جر لدن الغصوني =اغصون سدر (ن) جرها السيل جرا
وأهله من أول بالورق يورقوني= على غدير (ن) تحته الماء يقرا
على الذي مشيه تخطي بهوني= والعصر من بين الفريقين مرا
وأكثر عذاب القلب يوم اسنحوني= بيح بصبري لو بغيت أتدرا
لا ضاق صدري قمت أباري الضعوني= مع الخفا وعن الحسود أتدرا
وقلبي عليه أشفق وتبكي عيوني= والحال من ود الحبيب تبرا
يا عزتي لي من تفرق شطوني =عزا لي أرمي بالسلب وأتعرا
أدعج غنج يذبح بسود العيوني= يذبح ليا منه هنف واستمرا
إن مت في غالي حشاه أدفنوني= في مستكن الروح ما هوب برا
يضفي عليّ بخينقه والقروني= ومبيسمٍ عن الهبائب مذرا
وخدا (ن) كما البراق وسط المزوني= تقول براق من الصيف سرا
وقفت عنده شايهاتٍٍ عيوني= كني غريرٍ باللهاوي مضرا
فإن كنت في حد (ن) بعيد انقلوني= على هديّ الزمل مشيه تدرا
لا مبعد عنهم ولا قربوني = ولا عايف (ن) منهم ولاني مورا
ياليتهم بالحب ما ولعوني =كان أبعدوا عني بخير (ن) وشرا
أو ليتهم عن حاجتي سايلوني= يوم أني أقعد عندهم وأتحرا
أو ليتهم يوم إنهم ولعوني =خلوني آخذ عازتي وأتدرا
أو ليتهم من زادهم أطعموني= حيثي على اليّتيم قمت أتجرا
ويا ليتهم بالدرب ما واجهوني= ويا ليتهم ما زدوا الحلو مرا
لا والله إلا بالهوى هوّجروني =هجرٍ به الحيلات عيت تسرا
رحم الله شهيد العشق والغرام / دخيل الله بن عبدالله الدجيما العتيبي وأسكنه فسيح جناته .
|