[وافي السبـيعي]

يا الله يلي كل كرب تزوله=يا سابق علمه على حكم داوود
تسقي البلاد اللي تقافت محوله=في طالع الوسم هماليل و رعود
تلقى الخزامى و النفل في سهوله=ينثر عبيره كلما هبت النود
حيثه مرابينا زمان الطفوله=و اليوم جازيناه بالبعد و صدود
و اجدادنا مثل الضراغيم حوله=دون البصيره صابرين على الكود
لى عاند الجاهل تقفوا زموله=ينحونهم لى جوا محادير و سنود
من لابة راس المعادي تزوله=لى جا نهار فيه طارد و مطرود
لطامة العايل بحق تعوله=إن تاب وإلا عدله خشم فهود
كم واحد بسهومهم سبقوا له= جا بيصيد و فتشوا فيه مصيود
لى جاهم الهاشل و نوخ ذلوله=فلوا حجاجه باشقر البن و العود
جروا من أشباب الغنم و ذبحوا له=كبش على كبر الصحن تقل مفرود
و الى راح منهم شي ما حسبوا له =ربعي سبيع اللي خطرهم على الزود
لى شافوا المداد ما عرضوا له=و لا يحرمون النقذ مثل صاهود
لى صبحوا راعي الدبش شردوا له=ما يصبح الماخوذ معدم و مجحود
و ليا ظهر منهم خطاة العذوله=يروح عمره ما بدر منه منقود
يا عاذلي عجل برايك تقوله=لى شفت فيها فالخطا غير مقصود
و صلوا على طه محمد رسوله=عد الجراد و عد شاهد و مشهود



ابيات جزله بيض الله وجهك