[خيَّال الغلباء]

المشاركة الأصلية كتبت بواسطة حمود العامر

نبـدي بذكـرالله علاّم الغيوب= منجي سفينة نوح من طوفانهــــا
الواحد اللي رحمته تمحى الذنوب= سبحان رب الكــون عالي شانهـا
اللي ليا صكّت معابير الـدروب= ماصـك دون المحتـري بيـبانهــا
يا الله ياللـي ماحدٍ عنك ينوب= حلمــك علينا ياقديـم احسانـها
كريم يالمعبود ياجـزل الوهوب= يامنقذٍ عقـب اللهـف عطـشانهـا
يافارج الشدات وامزيل الكروب= انزل علينا الغيـث يارحمانـهـــا
القاع جفّت وامحلت مع كل صوب= والناس ضاقت بــــه جميع اوطانها
الحاضرة والباديـة كلّه تلوب= دون المواشــي ضيّعت غرّانـــها
يا الله بنوٍ باوّل البدري سـكوب= من غر مزنٍ رحمتك ربّانــــهــا
نـوٍ يعطّف مثل تعطيف الحلوب= تسوقه القـدره على ميحانــهــا
ياخذ ثلاث ايام ثلجـه مايذوب= واسبوع مايلحق حـمل وديـــانها
متى يقولون امتلت كل الدعوب= والقاع لبست من حلـــي الوانـها
فيهاالخزامى والنفل غطّى السهوب= والشيح والقيصوم مع قحوانــــها
تلقابه النجّاب مع راع الذهوب= بالليل يجمعهم حدى فرقانــهـــا
متى الزبيدي تمتلي منه الجعوب= ومتى تزول عــــن النفوس ادرانها
ومتى المها والريم واجوال الخروب= تحتاس بالسيحان مع ريلانــهـــا
يازين هد الطير بافروقٍ هروب= من شافته تخطولت جنحانــهـــا
واسراب كدري القطا حين الغروب= باطراف قطعانٍ تبي مـرحانـهـــا
من العراق إلى الحجاز إلى الجنوب= ومن الخليج إلى جبل حورانــــها
نبي نميل منين ما هب الهبـــوب= دام الوداعة ماحضر ديــانــهـا
نمشي مع الذعذاع والعمر أمحسوب= وسلاحنا بالله قو إيــمانـهـــا

أخي الكريم / حمود العامري السبيعي السلام عليكم ورحمة الله وبركاته وبعد : رحم الله الشاعر / ناصر بن حمود العامري السبيعي وجزاه عنا خيرا على هذه القصيدة الجزلة مع أطيب الأمنيات واسلم وسلم والسلام .