[خيَّال الغلباء]

بسم الله الرحمن الرحيم

يالله أنا من جود حسناك طالبك=عفوك ومدك حيث منت بخيلى
يالأدمي دنياك هذي تعذبك=لو طفت فيها مالقيت الدليلى
كل على مذهب إمامه يخاطبك=يبيك من زايد ذنوبه تشيلى
وإليا عصيت أهل المذاهب تعاتبك=كل يقول أبيك يمي تجيلي
ولو انتحيت بعيد بالسوء تطلبك=وكل بصاعه من ذنوبه يكيلي
أحد يصحح لك حديثه ويرهبك=وأحد يقول الحق عندي نزيلي
وأحد يخيفيك في كلامه ويدبك=وإبليس يضحك له وهو مستشيلي
الناس عوجان المناطق تكذبك=وعن الصحيح الكذب معهم بديلي
إن ما رضيت بقولهم نتف شاربك=وتكبر ذنوبك لو غناك تهليلي
ناس على درب الفضيله تحاربك=وعلى دروب الشر تهذل هذيلى
ودروبهم عسرات عوج وتتعبك=ما تستوي لك لا ولا تستويلي
ينبيك عن دنياك ماضي تجاربك=وعزي لحالك كان عرفك قليلى
اتبع نبيك واترك اللي مجنبك=واقضب مماشى سنته لا تعيلى
اللي بغار الثور للرشد يندبك=وأبو بكر عنده نديم وخليلى
نصايحه للرشد حذرا تغايبك=هرجه صحيح وكل فعله جميلي
سنة نبيك للفضيله تقربك=المصطفى ماله شبيه وعديلي
واحذرك عن نقالة السو تقربك=ومن يتبع العايل لزوم يعيلى
لو أنت ما تغضب ترى الناس تغضبك=وعقب المعزه يجعلوانك ذليلى
وترى ردي العرق للعيب يجذبك=وتصير بدروب الردا له عميلي
وبنت الردي حذراك حذراك تعجبك= واحذر تصير لمثل هذي حليلى
وعن ما يعيب النسل عرب مناسبك=وعليك في بنت الحصان الأصيلي
يجي ولدها فارق عن قرايبك=ويقف في وجه الخصيم القبيلي
إن كبرت القالات بالفعل يعجبك=ويبرد همومك كان قلبك غليلي
مثل القطامي في هداده يشببك=والدم من مخلاب كفه يسيلي
إليا صار ما صلبين الأرياء مكاسبك=تراك بين الناس تبقى هزيلي
وترى دروب الخبث يالعبد تذهبك=ويفوت عمرك ما تحصل حصيلي
احذر يابن حوا تطمن لحاجبك= إلا لرب للخلايق يزيلي
اللي بعفوه عن عذابه يرغبك=وعينه لكل الخلق دايم تخيلى
في لوحه المحفوظ يا لعبد مذهبك=نزل بحق وكل ما به فضيلى
ومعاشر الخايب مع الناس يذربك=وتصبح قليل الميز عقلك هبيلى
ومعاشر الطيب على الطيب يجلبك=ويرقيك للعليا بظل ظليلي
لا تقرب الأجرب بالأمراض يعطبك=يصير جسمك مثل جسمه عليلي
ممشا الخفامن صافي العقل يسلبك=ويصير لك يم الرذيله سبيلي
وعن مارد الأنذال نزه مشاربك=واشرب نظيف لو ورادك طويلي
ولياك تنسى يا ابن الأ جواد واجبك=واللي يروم المجد حمله ثقيلي
يالاّدمي وإن كان كبرت مصايبك=ازبن على محي البلاد المحيلى
ازبن على رب بعرشه يراقبك=وناجه وبعد العسر يره جليلي
ناجه ولأجل ارضاه وجه ركايبك=وخلك لعلام السراير دخيلي
هو الذي ينجيك من كود صايبك=ويذريك من كربات هول مهيلي
يا لعبد مكن عند ربك مقاضبك=وفكر وقدر وانتبه لا تميلي
ولا أحد من الخلاق يالعبد حاجبك=هو الذي مده وعفوه جزيلى
وهو الذي في ما فعلته يحسابك=وهو الذي بأرزاق عبده كفيلى

منقول مع خالص التحية وأطيب الأمنيات وأنتم سالمون وغانمون والسلام .