[حمود العامر]

الدار ما حنا بها مستريحين = ما ها ومرعاها تنكر علينا
قلت آه انا يادار متى تزينين= متى بركب المملكة تلحقينا
يا دار راح العمر وحنا امهانين= وش حيلة القاصر مع الطايلينا
الله يجازي من بنا مستبدين= لا خايفين الله ولا مستحينا
مريضنا يروح لديار ثانين= ان طاب وان ما طاب للشا متينا
مصالحٍ حرمت على المستحقين= راحت بها الواشين والماكرينا
المغرضين المترفين الأمينين= باللي حصل منهم عسانا اكتفينا
با سباب هذا صارت الناس قسمين= احدٍ شمالٍ راح واحدٍ يمينا
يا زارعين الحقد ضد البريين= لا بدكم من بذركم حاصدينا
ياللي على السرقات والكذب ناشين= الى متى في غيكم سابحينا
هذا الكلام اللي عليه البراهين= والله على قولي من الشاهدينا
قلته وانا من ساس قومٍ عريبين = ما نقبل الطولا ولو من حدينا
حنا لوافين العهد دوم وافين= ولغير وافين العهد ما وفينا
نمشي لصاحبنا على الراس والعين= هذي طبيعتنا وفيها نشينا
خصايلٍ فينا قديمه وها الحين= من فضل ربي عنها ما جزينا
شفي شغاميمٍ بهم يوخذ الدين= يا ما عليهم قمت اجر الونينا
هم حاصلي لا زاد كبو الخصيمين= يجبر بهم كسري وهم نازحينا
ربعي هل العرفأ كعام المغلين= سبيع لا قالوا هل الفعل وينا
اخص عزوةٍ لي اموالين= وسّامة المشعاب والمطرقينا
وجدي عليهم مير ما هم قريبين= لو هني من شافهم له بعينا
ما الام يوم ابكي سنادي والادنين= والا القبايل فيهم النايفينا
صلاة ربي ما دعوه المصلين= على النبي اللي بهديه مشينا

[/poem][/list]