[جعد الوبر]

المشاركة الأصلية كتبت بواسطة خيَّال الغلباء

بسم الله الرحمن الرحيم

إخواني الكرام / أعضاء ومتصفحي منتديات قبيلة سبيع بن عامر الغلباء السلام عليكم ورحمة الله وبركاته وبعد : إليكم هذه الأبيات النادرة في موضوعها من قصيدة رائعة من روائع الشاعر / صالح بن حسن الوهيبي المجاذمة الزعبي أحد أبناء قبيلة زعب المعاصرين وهو صاحب إسطـبــل الـريــشــا لأبناء / حـسـن بن عبدالهادي الزعــبي وهو مولع بحب الخيل كم عرف عن قبيلته إقتناء الخيل الأصيلة منذ القدم واشتهرت بها وهي موجهه لصاحبة / خالد الطويان أبو عبدالعزيز وهو صاحب خيل وإسطبل أيضاً ولعشاق رياضة الفروسية عامةً وبالأخص رياضة القدرة والتحمل وهي نوع من أنواع الخيل سباقات الخيل جواد التحمل ويقول فيها :-

راكب اللي بالخبب رميه بعيد=كن زوله عرضة عيال العرب
عرضة اللي لابسٍ في يوم عيد=أجمل ثيابه لا شاف اللي يحب
يطرب اللي راكبه بأعذب نشيد=والنشيد يزين إذا زان الطرب
منوة اللي بالتحمل ما يحيد=ما تحيــــده لزة خيول (ن) شبب
الله اللي مده الحي المجيد=بالوصوف اللي لها الشاري طلب
قال في وصفه يبي شكل فريد=تفرقه بين الخيول اللي تطب
لا رفيع ولا قصير ولا بليد=وإن هذب ما تلطش يديه الركب
عادل الساقين سكات الحديد=ما بهن حوسه ولا فيهن حبب
مفرق العينين شبر ما يزيد= وإن شبرت الصدر زوّد لا تهب
والمناخر لا صهل قبل المديد=تشبه أنفاق الشفاء لا من سحب
والأذاني مثل رادار الطريد=يتعب اللي يطرده لا من هرب
ما تقصص جادله ملهوف جيد=كنها الراية على الرجم انتصب
ناصب عنقه ومشواله شريد=دون ما تشعر تتمتم بيا رب
لا شخص بالعين تفهمها وعيد=لو تهوشه ما رمش لك بالهدب
قاسي راسه ولا هو بعنيد=بالسياسة ينتسايس والأدب
جاهز قبل السبق ماله نديد=بشر اللي جهزه كسب اللقب
حدّدَ المفحام في قارمن جديد= بالكناتر والمسار وبالخبب
لا نهض من موقفه نهضة عقيد=صف عسكر معتدله ما اخترب
والحوافر لبسوه من الحديد=شوف عيني بالصفا تقدح لهب
يشعل جروم الغضا منه وقيد=واستوت لقدورها شب الحطب
يقطع الجولات بالعزم الشديد=متعب خصمه وباسه له صعب
يوم غيره لا فتر حيله وحيد=خايب سده وسد اللي ركب
راح وقته مع كديش ما يفيد=لا عطاه إنجاز ولا عمره كسب
والمراحل لو تزيد أو ما تزيد=ما طفى عزمه ولا جاه التعب
ما شكى ضلعه ولا نبضه يزيد=حارت اللجنه معه وأهل الطلب
مصرعه في يد خياله فريد=صنع لوتس يضمنه وقت النشب
صانع سرجه خواجات السويد=من ستيتس راسيٍ بك لا هذب
كنك الدكتور فوقه أو عميد=جامعيٍ فاقهم بأعلى نسب
فاهم كل القوانين ويجيد=بالدروس اللي عطيته ما رسب
لا ختبرته حل كل اللي تريد=والسبب فهمه وشرحك له سبب
بالمحافل رافع راسك أكيد=وبالمنصة توجك كاس الذهب

منقول مع خالص التحية وأطيب الأمنيات وأنتم سالمون وغانمون والسلام .

مشكور وما قصرت ولا هنت