بسم الله الرحمن الرحيم
هذه القصيدة أرسلها الشاعر الشاب / علي بن رسام السبيعي
إلى الشاعر / عايض بن فرزان السبيعي
العين يا عايض جفا موقها النوم=وقمت آتحرا النوم ماني بنايم
ينام من لا شال في صدره هموم= وأنا بقلبي هم كنه يعايم
وقت العشي عديت في راس مزموم=ضلعاً على كل المشاريف قايم
وسقت النظر ما بين قارات وحزوم=بين الفياض وبين ذيك العدايم
وقمت آتذكر وقتاً أقفى على القوم=واقفا بهم مابين الأمواج عايم
وحولت من ضلعي وانا القلب مكلوم=ويحوم بي من جاير الهم حايم
وأظن ماني يا أبيض الوجه مليوم=من وقتي اللي شفت منه الهزايم
غديت انا وياه هازم ومهزوم=واثره هزمني وانتحى بالغنايم
وخلاني أعد الملمات بالكوم=وجود علي سياج مثل الشكايم
نجاهد الدنيا بهمات وعزوم=يالله تسعفنا بقو العزايم
اشفق لرفقة مثل شرواك واشوم=عن رفقة اللي ما يعرف اللزايم
حيثك رفيق ورفقتك تبعد اللوم=وأيضا من اللي يقطعون الخرايم
يا زينها لا دار فالمجلس علوم=ثم انصتوا لك لابسين العمايم
قصايداً يطرب لها كل زيزوم=أحلى من المشرب على كبد صايم
لعل تسلم من عنا الوقت وتدوم=وألا مصير الحي ماهو بدايم
وصلاة ربي عد ما تنشي غيوم=على النبي وعداد برق الغوايم
وهذا رد الشاعر عايض بن فرزان
يالله يا معبود يا خير مزهوم=يا أبا الفرج مذري هبوب النسايم
يا فارج الشدات عن كل مضيوم=يا كافلاً رزق البشر والبهايم
أنت العظيم اللي لك الكون محكوم=وبقدرتك تسهل جميع العظايم
عساي لا ظالم ولاني بمظلوم=وجنبني أهل المظلمة والظلايم
يالله عسى ماني بمفلس ومحروم=لا وزعت بين العباد الغنايم
وسهل لنا ما كان كايد ومعدوم=يارب يا محيي هميد الهشايم
لي مدة مشغول والفكر مزحوم=والجو متعكر ولا هو ملايم
أغوص في غبات الابحار واعوم=وبيني وبين هجوس قلبي مزايم
مشغول من قبل أمس ثم أمس واليوم=أليم اللي شردها ما تلايم
نوادر ما تنشرا بأول السوم=مثل الجواهر بين بايع وسايم
ليمتها بالغصب والأمر محسوم=وجتني مطيعة بالوفاء والتمايم
شمل البيوت وشمل الأفكار ملموم=عقب الشتات تصير مثل التوايم
صارت كما عقداً من اللول منظوم=وعلى نوادرها لعايض وسايم
هديتاً ما أهديتها الا لشغموم=الساس طيب والردا عنه شايم
ابن الرفيق اللي مقدر ومحشوم=مصيون عن درب الردا والذمايم
حراً ما هوب يرافق أنذال ورخوم=ألا وحوله ما تحوم الحوايم
بأعلى الجبال الشاهقة يكسر الحوم=صيده سمان ولا يصيد الهلايم
نجماً تبين كن ما حوله نجوم=نوره سطع بين الجدي والنعايم
والذيب يبدي في مراقيب ورجوم=ما هوب يبقى في وطا الأرض هايم
يصبر على الشدات والغيظ مكظوم=لو كان ضامه من قسا الوقت ضايم
وكلاً على الدنيا له اهداف وحلوم=لكن بعضها دونه الجو غايم
ما جاك يا ابن آدم مقدر ومقسوم=لو كنت باقصى الشرق وألا تهايم
واللي شكا منه أبيض الوجه مفهوم=واقول مالك يا فتى الجود لايم
يقول أنا عديت في راس مزموم=رجماً يلاحي فيه ورق الحمايم
كم واحداً من سود الأيام مهموم=وغيرك كثير من الزمان امتشايم
هذا الزمان اللي تصقر به البوم=وبالأقرباء عم الجفاء والخصايم
يشيب منه اللي عن الديد مفطوم=واحتار من صبره تعدا الكظايم
وقتاً تغير فيه عادات وسلوم=فيه المشاكل والبلاء والجرايم
يا كثر ما في الناس غادي ومنجوم=فكره معوق لو سليم القوايم
في رفقة الرديان ماني بملزوم=واهل النذالة جعلهم بالثلايم
بعض العرب ما أجيه لو كان معزوم=والبعض ما نحتاج عنده عزايم
بنك التجارب لي به أرباح وسهوم=وعرفت صدقان الرخاء والولايم
أساير الأيام والسر مكتوم=وخذيت من وقتي دروس وقسايم
وعلى النبي أفضل صلاتاً وتسلوم=اللي بنا للدين ساس ودعايم