في اجازة عيد الاضحى الماضي إجتمع في المحافظة من أبناءها الساكنين خارجها لظروف العمل ، فلما رأي الشاعر فيصل بن خالد البحيح هذا الإجتماع تأثر به وهاضت قريحته بهذه القصيدة راثيا هذا الإجتماع ومتمنيا دوامه ومتمنيا المطر لرنيه الحبيبه .
ياعيد لعلك علينا تعودي = الحمد لله فيك عشنا سعيدين
الحمد لك والشكر لك يا معبودي = أنت الذي لك صايمين مصلين
اموحدينك بالعباده وكودي = أنت الذي رضيت الإسلام لك دين
واروح وأرجع للتحمد واعودي = الي جمعني مع ربوع محبين
ربعي هل الناموس صلب الجدودي = كسابة للنعم مبطي وذالحين
هم القراح وهم سم الكبودي = لا كشرا سود الليالي سلاطين
وهم الأسود وهم عيال الأسودي = اللي على فعل المواجيب ضارين
رجالهم دايم بطيبه يزودي = في مجلسه تلقاء شباب ومشيبين
والباب ما يقفل عن اللي يرودي = ويفرح بهم لا جو من البعد لافين
لا جوه كنه من الجلوس محدودي = من نايد العربان ولا الموالين
وذبايحه من كاسرات العمودي = يجزع على الغالين قبل الرخيصين
والبن خولاني وعود الهنودي = لا وردوه مدورين التثامين
مهوب من اللي يجمعون النقودي = اللي يجيبه نقد واللي يجي دين
ويالله يا منزل تبارك وهودي = كثر حلال اللي بالأمجاد وافين
كثر حلال اللي بوجده يجودي = آمين يا محصي مخاليقه آمين
وجعل مراويح السحايب تقودي = تمطر على دار هله مستحقين
نوه حدور والنسايم سنودي = ويثبت على المنشاء بالأيام تسعين
تلاعج بروقه وجاله رعودي = وضفا على الوادي من يسار ويمين
وروي الرغاب وجاء لنوه فصودي = يخف نوه من مناشيه ويزين
ونبت الدبق وخضر به كل عودي = وترجع ديار مسنيه قد لها سنين
وعميت على ما قيل عين الحسودي = كل يقول الحمد لله مروين
آمين يا رب الركوع السجودي = يا منزل سورة تبارك وياسين