انا اتعبني التفكيـر بالمـد والجـزر=هجوسا ً كما الأمواج تقبـل وتقفيبـي
على غير شفي قامت تداني الهجر=بعد مالجت بين الضلوع المحاديبي
تجاهلتها واخفيتها داخل الصدر=وتأثيرها في ضامري بيّن الليبي
اقضي بعض الأوقات كني على جمر=ولا ابغا الغشيم قليل العرف يدريبي
أجامل ومكرات الزمن تطـوي العمـر=ويارب ساعدنـي وسهـل مطاليبـي
الايام تجري والشهـر يتبعـه شهـر=ولاني بـداري ويش يخفيلـي الغيبـي
حياة البن آدم بين قوسين في (خطـر)=ولو يمهل الديـان مايمهـل الشيبي
وانا صرت مثل مصارع الموج في بحر=ابا الربح واخشا لاتضيع المكاسيبي
ظروف الزمان القاسيه مالهـا حصـر=تزيد المشاكـل والبـلا واللواهيبـي
وهي عند بعض الناس تبنيلها قصـر=تحطه صديق ومن خيـار المعازيبـي
تزوره بتال الليل والصبح والعصر=وكم كدّرت من صافيات المشاريبي
ودنيا الشقا والهم يبغيلهـا صبـر=كشفنـا حقايقهـا بكثـر التجاريبـي
وانا في رجا ربي يسهل لـي الامـر=عزيز الجلال ورازق الطيـر والذيبـي
عسا الله يخارجني ويكتب لي النصر=على ذا السنين اللي بها الشك والريبي