ياوجودي كل ماهب نسنـاس الشمـال =وجد من حدّه زمانه على اللي مـا يبيـه
وياوجودي كل مااغفيت ثم مال الظلال =لاغفت عينـي ولاذقـت شـيٍ مشتهيـه
وجد من قفّى وهو في رجا كلمة تعـال =والتفت من عقب مااقفى ولحدن لـدّ فيـه
وياعذابي لادنا الليل من روس الجبـال =وانتهى يومٍ من العمـر ماعـاد ارتجيـه
وانتي ابعد من سما الحلم ووصالك محال =يابعد من هلّ دمعي ضحى الفرقـا عليـه
ياغناتي لاتحسبين دمعـي يـوم سـال =ضعف والاّ خوف والاّ كـذا والاّ كذيـه
والله اني من رجالٍ يضـدون الرجـال =لكن الحظ الـردي سـاق دمعـي كلبيـه
ووالله اني كل مـادار حوليـك الجـدال =قمت كن الموت يشر على قبـري يإيديـه
ووالله ان قد لي وانا اصد لاجالك مجال =صدّت اللي لاتضايق تذّكـر قبـر اخيـه
ومن سألني قلت مدري واذا عاد السؤال =قلتله تكفى سؤالك تـرى ماهـو وجيـه
وش تبيني اقول عماََ ترى ذبحي حـلال =والخطا منها علي صرت احبـه واهويـه
عذرها لو ماتعذر مثل واضرب مثـال =واحدن مايعرف الحر الأشقـر يشتويـه
وان رجعنـا للتواصيـف لله الكـمـال =لا انتهى ليـل المزاييـن جاتـك تبتديـه
كنها غفلٍ مع البـدو طاويهـا الحيـال =ما يميز وصفهـا الاّ نبيـهٍ مـن نبيـه
واهني اللي وصلها وذاق امـن الـزلال =رشفةٍ مع غفلة النـاس مـن فيهـا لفيـه
واعزتي للي سواتي عشق ما لا يطـال =ويوم طاله ضيع الحلم بين أمـه و ابيـه
يااول احلام الطفوله على حـد الخيـال =الرجا بللي حمى البيت من حملـة بريـه
حال دونك سيف عنتر وتاسع حول حال =باثر حولٍ حال دونك وانا ادعي هيه هيه
هيه يللي غرك الحسن واطغاك الجمـال =والله ان اموت ماشفت لاوصافـك شبيـه
لو يسام الحسن والتيـه بجنيـه وريـال =مابقى في سوق غيرك لا ريال ولاجنيـه
كيف اهدك للمقابيل وانتـي راس مـال =راس مال ومال والماال مايعطى السفيـه
حافظك حفظي لعيني ورمشي لك جلال =وانتي تشحّين بالمـا وانـا شفّـي مويـه
شايفن ظلمك وساكت وطال الليل طـال =لاتركتي طعن قلبي وانـا ماقلـت ليـه ؟
لو بقا للهيل صبرن على فـوح الـدلال =مابقى للقلب صبرن علـى شـيٍ يجيـه
كنت احسب ان الغلا زال واثره لايزال =في الحشا ماكنه الا دخيـلٍ فـي وجيـه
ساقني حبك على الموت وسنيني هـزال =والظروف اقسى من الظلم للعرض النزيه
وانتي تسوقين عقلي على حـد الهبـال =تحسبين ان من بغى شي يقـدر يشتريـه
والاّ انا ياوجد حالي وجـودن مايقـال =وجد من ضحى بغاليـه لرضـا والديـه
وياوجودي يااول العمر قبل ألبس عقال =وجد من باع آآخر العمر في رغبة ذويـه
وياوجودي كل ماهب صوتش من شمال =وجد من حدّه زمانه علـى اللـي مايبيـه
الشاعـر / ضيـدان بــن قضـعـان