الشاعر الكبير / محمد بن حويل العصيمي يمدح الشاعر الشيخ / مطلق الجرد المليحي رحمه الله
كُتب : [ 18 - 07 - 2006 ]
بسم الله الرحمن الرحيم
قال الشاعر الكبير / محمد بن حويل العصيمي العتيبي في الشاعر الشيخ / مطلق بن راشد الجرد المليحي السبيعي رحمه الله وأسكنه الجنة هذه القصيدة :
يا أبو فهد جيتك مسير وناصيك
= منصى الرجال اللي تنصى الرجالي
أنا نصيتك طامع بالوفا فيك
= وأنته تحل معقدات الحبالي
لا تحسب إني طول الأيام ناسيك
= تراك يا كساب الأمجاد غالي
يالجرد ريف اللي من الوقت ناخيك
= تصبح ذرا له عن هبوب الشمالي
وأقول يا مطلق عسى الله يقديك
= على طريق الطايله والعدالي
أبوك في كسب الجمايل مربيك
= مرقيك في روس الهضاب العوالي
أنت الحصان اللي طوال مداليك
= نفخر بذكرك يوم حل المجالي
دنيا ودين وثابتات مواطيك
= وأنت الحكيم اللي تحل الشكالي
وأنت الفهيم اللي تحل الشرابيك
= يوم المضاهي ما كسب راس مالي
جدك على طول الليالي يناديك
= مجنى جدودك من طوال المدالي
أنا أشهد إنه بالجمايل موصيك
= بالجود والمدات ما له مثالي
يا كاسب الطالات نفخر بطاريك
= يا ما عطت يمناك من كل غالي
مدتك جزله حيثها من هقاويك
= وهذي فعايل طيبين الرجالي
أنت الذي تكرم شوارب عوانيك
= وريف لمن يشكي صدوف الليالي
وجهك طليق وواضحات دعاويك
= وأنته لربعك مثل شرب الزلالي
الله من أسباب المقادير ينجيك
= ينجيك يا راع الشحم والدلالي
عساك يا مطلق تنور لياليك
= عز من الله يا كريم السبالي
ولا نستمع للصايع اللي هرج فيك
= ما يفهم أهل الطيب يا هملالي
وأنته طويل ذراع ما فيه تشكيك
= طيبك يعبرلك جنوب وشمالي
الخلق تشهد لك بمدات أياديك
= يا ما عطت من دقها والجلالي
فعايلك بالجود تحمي قوافيك
= تعرف حبالك في المراجل طوالي
تم الكلام وزبدة الهرج تكفيك
= وصلاة ربي عد وبل الخيالي
على الذي ما فيه ريب وتشكيك
= شفيع الأمة يوم ميل وعدالي
وأنتم سالمون وغانمون والسلام .
|