يالله ياللي طالبك مايخيبي = ياساتر العورات تستر عرانا
ياربنا ياللي للدعاء تستجيبي = ياقابل الدعوات تقبل دعانا
ويالله دخيلك من رداة النصيبي = ومن هرجة(ن) يرمى بها في قفانا
يافكرتي من شي(ن) أشوفه غريبي = نار على جهالنا وتعصانا
وصارت أقرب العربان خصم(ن) طليبي = يالله تصون أعراضنا وتحمانا
وصار الحصيني تالي الوقت ذيبي = والحر الأشقر صار مثل السمانا
والسيل جنّب عن مجاري الشعيبي = ترعد وتبرق والمطر من ورانا
والمال غطى للردي كل عيبي = لو قال أنا ببوق بيت أقصرانا
شي(ن) يشيّب قبل وقت المشيبي = وقت(ن) حدى اللي قبلنا ويحدانا
وأشوف وأسمع وأكتمه مادريبي = لو كان تخطي ربعنا وأصدقانا
ولاطاب فينا الوقت حنّا نطيبي = وليا تردى الوقت بيّن ردانا
كل(ن) على متنه عتيد(ن) رقيبي = وليا عطينا مانبيّن عطانا
وصلاة ربي عدّ شمس(ن) تغيبي = على نبي(ن) للهدايه هدانا
:::... الشاعـــر ...:::
:::.... مبارك فايز البخيت المحمدي السبيعي ....:::