[حسن الفاهمي]

لا صابني وقتي بحيف
اصير عليها لو ندوم

مشكي على راس ضعيف
ولا اشق وجهي لرخوم

ياشيلة شيلة منيف
ولا عساها ماتقوم

احب ذا النفس العفيف
اللى علومه لنجوم

واحب ذا الظل الظريف
اللي كما وبل الغيوم

واصد عن وجه كسيف
ما جابلي غير الهموم

احب تصويت المضيف
اللي برحبله بقوم

واحب مجلاس مريف
لا جيتله ماشفت لوم

واصدعن مجلس مجيف
اللي يجعله لسموم

احب ذا القلب النظيف
راعي الوفا وقت اللزوم

واحب من هرجه يقيف
ماجبها عل كبد حوم

واصد عن نمة سخيف
ولا عندي له سوق يسوم