[فاهم النظرة]

القلم والمحبرة :-

يالله يا منجي فريق ويا مهلك فريق = وكل شيء يعملونه عبادك تخبره
لا تحمل عبدك موحدك مالا يطيق = وأنت في محكم كتابك بدينك مخبره
اهده برحمتك حتى من الغفله يفيق = وارضه بمقسومك اللي قسمت ودبره
وبعدها بجيب شعراً بجمهوره يليق = مير سجل يا قلم والحبر من المحبره
يشبه لطعم العسل يوم يجنى من الرحيق = في رضى الجمهور كله صغيره وأكبره
يا عساه يبل حلق العطش لا نشف ريق = في الليالي المقبله والليالي المدبره
في زمان اختلف به شقيق مع شقيق = ومن جزع قلبه من الهم ويش يصبره
والصدر واسع ومن شكر ربي ما يضيق = ومن عطاني سر في وسط صدري بقبره
احفظ أسرار العدو مثل ما أحفظ للصديق = مستحيل أفشيه للناس لا كون اخبره
وعن طريقي ما ثناني نباح ولا نعيق = وأي طريقاً للمراجل يودي بعبره
ومن عيوبي كان جتني خطيه من رفيق = أتحاشاها وكسره نحاول نجبره
وكان جات من العدا قدمهم كني طويق = والجبل من يذرعه في مداه ويشبره
ما تراجع لين أولع وطن لأعدا حريق = ومن غزيته قبل وقت الهجوم أخبره
وفي الختام العود الأزرق على الحضار سيق = وكل ما كنه ضميري لساني عبره

الشاعر : مفرح سيف الملحي السبيعي ( فاهم النظره )