انتقل إلى رحمة الله يوم 17ـ 10ـ 1437هـ
الشيخ مفرح بن الحميدي بن هليمة
شيخ قبيلة بني ثور من سبيع
عن عمر يناهز 88 سنه قضاها في طاعة الله واصلاح ذات البين
والمطالبة ببعض مشروعات ديرته
رحمه الله وغفر له
وفيما يلي بعض قصائد الرثاء التي قيلت
قصيدة الشاعر أسامة الشارخ رثاء في الشيخ مفرح بن الحميدي بن هليمة
رحمه الله
الشمس غابت والأسى في غيابها= يعلن رحيل اليوم فحوى خطابها
دنيا سننها ثابته ماتغيّرت= تصفي زمن وأزمان تكشف نقابها
تظهر لنا من سرها مابدى لها= والخافي اللي لفته في ثيابها
واليوم حنا بالحزن من يلومنا= يمضي القدر والنفس تشكي مصابها
ودع كبير القوم ربعه ولابته= في سنتن كل البشر في ركابها
شيخ جليل بالمعالي منازله= له حكمة في سيرته يقتدى بها
وله نظرة تصدق ويبعد مرامها= يعرف بها عذب المطر من سرابها
وله وقفة يوم الملاقى وينتصر= يوم الخلايق علمها في حرابها
نال المكارم في حياته ورامها= من نشأته والشيخ يوفي نصابها
والدين سمته بين ربعه وغايته= والنفس من عذب السجايا زهابها
وسنة نبيه هي طريقه ومنهجه= وهي كلمته بين الخلايق حكابها
الله يجعل له مكان ومنزله= جنات ينعم خالد في رحابها
ويبقى عزانا بالخلف في مكانته = والشمس تشرق لوشكينا ذهابها
ومفرح الوافي بتبقى مناقبه= روضة وفا يمطر علينا سحابها
الشاعر المميز أسامة الشارخ
قصيدة الشاعر خالد بن ناصر بن هليمة في الفقيد الشيخ مفرح
سر ياقلم واكتب من الحزن مكتوب= من وحي هاجوسٍ يهل الغمامي
لا والله اللي راح شيخ ومحسوب= بالطيب والأخلاق والعرف سامي
حلال للصعبات للناس محبوب= وفي حزة الشطه جويد الحزامي
مفرح اللي ماذكر فيه عذروب== ابن الهليمه شيخ شمل ومقامي
ويالله ياالمعبود ياخير مطلوب= عساه للجنه عساه الرحامي
آمين يارحمان ياراحم ايوب= تغفر لشيخٍ مات والجرح دامي
قال الشاعر علوش بن صامل الثوري:
مرحوم ياشيخ المراجل والأفعال= مرحوم ياشيخ تنومس فعوله
ياطيب السيره وياطيب الفال= ياماخذ بالطيب عرضه وطوله
يامعرب الجدين والعم والخال= ياشيخ يانسل الفخر والبطوله
موتك يابو فيصل فجع كل رجال= وفقدك على روس العرب والحموله
عساك فالفردوس تحضى بمنزال= والرب يكتب لك رضاه او قبوله
هذي هي الدنيا وهذا هو الحال= أموات وابنا اموات كل بدوله
والناس قد قالوا قديما بالامثال= ما مات من خلف رجال زحوله
وخير الخلف وافي وللحمل شيال= فيصل مفرح ريف منهم عنوا له
شيخ محله للمطاليق مدهال= دايم ال جزلات الفعايل ميوله
الطيب يا فيصل توارثه الاجيال = وانته ورثت الطيب على أصوله
عليك نبي يابيض الوجه الامال= ياسيفنا اللي كل صعب تطوله
وقال فهد بن شداد الثوري السبيعي
اللي يموت وجاله افعال مامات= لو كان في قبره عليه النصيبه
مرحوم ياشيخ يقود المهمات= شيخ ولد شيخ يحل الصعيبه
زعيمها فكاك صلفات الازمات= من ضدته دنيا العنا يلتوي به
ابن الشيوخ اللي لهم فعل واثبات = هلايمه ماهيب منهم غريبه
قبله سميه خذ على نجد صولات= مطوي السقيان يلطم حريبه
لاجاء الخبر قوم نواهم بغارات= كل حرب نومه ولا يهتني به
زعيم قوم كلبوها زعامات= تغلب ولا ترضى عليها الغليبه
ثوري وراسه فوق من فوق هامات= تنزل له الهامات لو بالغصيبه
وقال الشاعر مسند بن سعود السبيعي
مرحوم ياشيخ القبيله هرمها= مفرح مفرح ويحزن فراقه
شيخ الشيوخ اللي يرفرف علمها= اهل الكرامه والوفاء والصداقه
واللي يدور للنسب يغتنمها= ألاد الأجرب هل فعول وعراقه
وشيخ ليا قامت خصومه هزمها= ويقابل الصاحب بخلق وطلاقه
وينزّل شيوخ العدا من قممها = شيخ خذ عنان المراجل عشاقه
رمز القبيله بالمروه حكمها= واليوم خذه الموت منها سراقه
عساه بالفردوس يقطف نعمها= مرحوم يابن المجد عز الرفاقه
عزاي في فيصل يومنه استلمها= حر تقلل وانتهض بانطلاقه
وقال الشاعر محمد سفر السبيعي :
شرف علينا الحزن من فوق مبناه= في الموعد اللي حزنه ماتأجل
من فقد شيخ عزوة سبيع تنعاه= أنا أشهد إن الموت يمه تعجل
ياسبق خطواته على الكفو سبقاه= من شرهة وجيه العرب ماتخجل
الموت يختار الرجال المسماه= اللي لهم تاريخ الامجاد سجل
العام من ضاقت به الارض يلقاه= واليوم عن صهوة جواده ترجل
ياجعل والله جنة الخلد مثواه= يسكن بها ب أمر العظيم المبجل
وقال الشاعر :رشدان بن سعدون الثوري السبيعي
الله يرحم شيخ شمل القبيله= عساه للجنه وتمحى خطاياه
خسارته على القبيله مهيله= شيخ الشيوخ اللي عديمه سجاياه
مفرح اللي يرتكي للثقيله= ابن الحميدي كاسب الطيب والجاه
راع الكرم يمناه ماهي بخيله= شيخ وشيد مع هل الطيب مبناه
نسل الشيوخ اهل الفعول الجزيله= يشهد له التاريخ والناس ثقراه
وقال الشاعر عبدالله بن حصين الصندلي السبيعي
شيخ من الغلبا صفاته مجيده= يفرض على كل الجميع احترامه
رحل وعزينا بديده بديده= عساه في الجنه سليل القرامه
ايماننا بالموت حق وعقيده= خط يودينا ليوم القيامه
له سكة ماهي علينا جديده= يعرض لنا في كل يوم سهامه
وقال الشاعر حمود بن مقبول السبيعي
احسن الله عزاكم ياربوعي سبيع= في وفاة الامير اللي ليا قال طال
واحسن الله عزا الاد الوجيرب جميع= في فقيد المراجل والفعول الجزال
وقال الشاعر محمد القريشي:
ما مات رمز الطيب والله مامات= في اصدورنا تارك بطيه علامه
الله أكبر كان في الناس همات= هامت مفرح تنفقد بالف هامه
وقال الشاعر مفرح السبيعي
مرحوم ياشيخ الشيوخ المسماه = مفرح وفقده علينا خساره
يالله عساه ف جنة الخلد مثواه= واحسن عزانا فيه واحسن جواره
وقال الشاعر معيض بن جزلة المديري
مرحوم ياشيخ ارجال المسماه= وانشهد انه راح منا الكريمي
يالله عسى في جنة الخلد مثواه= يقطف من الجنه ثمار ونعيمي
وقال الشاعر هذال بن شعيفان السويدي
للجنان الخضر يامفرح ابن هليمه= يرفع الله منزلك يارفيع المنزله
يازعيم اللابه اهل الفعول القيمه= كل ثوريٍّ من الطيب مقسمه أجزله
وقال الشاعر شافي بن رشدان الثوري
الله يرحم شيخنا يابني ثور= عساه في الجنه وينجي من النار
يشرب من الانهار ويعاشر الحور= وافضل نبي في جنة الخلد له جار
وقال الشاعر محمد بن نافل الفريض الثوري
عسى الله يرحم شيخنا اللي توفى اليوم= ويالله تجعل شيخنا من هل الجنه
وتجبر عزانا في ياحي ياقيوم= وتغفر ذنوبه كلها ياولي عنه
وقال الشاعر عبدالله بن سعد الحضبي
مرحوم ياشيخ بنى المجد وارساه= شيخ الوفا والجود والعز والطيب
يضحك حجاجه طيب في وجه من جاه= أنا اشهد إنه من رجال المواجيب
وقال الشاعر محمد بن غثيث
مرحوم ياشيخ الجموع العنيده= لاد الوجيرب ذخرنا للقيامه
تنعي سبيع كبارها والوليده= موتك يابو فيصل زعيم الزعامه
وقال الشاعر غانم بن نوار السبيعي
مرحوم ياشيخ علينا فقيده= جعل الجنان الخضر مثوى عظامه
ابن هليمه شيخ قوم وعقيده= وشيخ قبل حكم السعود ونظامه
وقال الشاعر عايش أبو ليل الصندلي السبيعي :
بعض الكلام يصير جمله مفيده= وغانم ولد عمي صدق في كلامه
الله يبيحه راع الاريا السديده= شيخ الرجوله والوفء والكرامه
قال الشاعر سيف بن غازي الثوري السبيعي
الخرمة الخرمة عليها الحزن لاح= استغفر الله ماقصدت أتباها
تنشدوا الثوري عن عن الوضع بايضاح= يعطيكم التفصيل يبحث خفاها
حزن على شيخ الوفاء نجم الاصباح= ابن الحميدي شيخ ربعي ذراها
عسى جنان الخلد للغالي مراح= يارد على الكوثر ويروي ضماها
ياشيخنا فيصل عسى الهم ينزاح= عصرية الجمعه فجعنا نباها
يحسن عزاكم ياطويلين الاشباح= ماتلام عينك يوم جادت بماها