قصيدة ترحيبية
بضيوف حملة التوعية الاجتماعية الشاملة برنية
قيلت في حفل الافتتاح 1/4/1472هـ
هلا مرحبا واعداد ما هبت الأنواد= وهلا ومرحبا بضيوفنا عد الأنوادي
وعدد ما امطرت غر المخايل من الرعاد= هلا يا جميع ضيوفنا عد رعادي
بمقدم ضيوف العز عمت بنا الأسعاد = وياليل يا ليل السعد ليل الأسعادي
حللتم هلا في دارنا والفرح يزداد= تراحيبنا بضيوفنا دوم تزدادي
ورنية قراها من على وادي منقاد = من أقصا السراة السيل ومقره الوادي
ثلاثمائة كيلو طولها وفي وسطها واد= ثمانين قرية من على ضفة الوادي
تبي تنمية ورعاية في جمع وافراد= وعسى التنمية تشمل جماعات وافرادي
أملنا بكم معقود واعلوم الرجال اجداد = ويستاهل البيضا رجّال لها فادي
مسؤلياتكم ضخمة وغنا بها عواد= وينشر خبرها في الصحافة مع الرادي
ويسمع امحافظنا ووجهة طليق وباد = وأملنا بعد معقود في وجهه البادي
كلنَّه لها يسعى فهو مخلص معتاد= يمشي النظام ويرفع البيت بعمادي
تراه عمود البيت ورايد من الرواد = يشيل الأمانة ويقدح النار بزنادي
وترى ابن هميل له دور في الصدر والميراد= على سلم ابن قطنان يا نعم الاجدادي
ومشايخنا واشرافنا يقدحون ازناد= لهم دور خير ويرسى البيت باوتادي
وعلى المجلسين الدور وبرق الحيا ينقاد= وعسى وبْلها سكّاب والخير ينقادي
وكل ترى مسؤول ويسند لها بسناد = وترى الدار تسعد بأهلها وتسعد اسعادي
ومبدى التعاون لو تحقق تراه امراد= وقوم تعاون راية العز ميعادي
ولولا المشقة في العلا كان كل ساد= لكن بالمرارة والحلا تبين الأسيادي
وتستاهلين اخلاصنا ديرة الاجواد= يا رنية سبيع انقولها فوق الاشهادي
وطنا وطنا المملكة ويهجد الحساد= سعودية أهل العز في كِن وابرادي
نرد البرى للي يرد البرى بعناد= ولا دارت رحاها نلطم الخصم بعنادي
نرده على الاعقاب ما يهتني برقاد= ومنهو طمع ما يهتني لذة رقادي
وعاشت بلاد العز وعاشوا أهل الامجاد= وفي ظل أبو متعب ولد راعي الأمجاد
حكمها البطل غصب على امغللة الأكباد = حكمها الموحد وعيدت له بالأعيادي
وبالختم مسك العنبري يختلط بالكاد= هلا مرحبا ترحيبة كنها الكادي
ونثني هلا بضيوفنا والغلا يزداد = هلا يا رجال الطيب والعز يزدادي
وصلوا على الهادي وما نسنست ببراد = على محمد المختار رسولنا الهادي
بقلم الشاعر/ محمد بن مفلح السبيعي
عضو المجلس البلدي
عضو المجلس المحلي
1/4/1427هـ