[الطير الخضر]

السلام عليكم

اخوي عبدالله الذعيفي عبيده ما فيها امير اسمه (جمهور) امير عبيده (ابن شفلوت)

اخوي اللامع ايه انا هو نفسه اللي تكلمت معك في منتداكم الثاني (ديوان الغلبا)

اخوي اللامع انت تقول والشيخ / هديف بن عبود وأخوه ناصر قتلوا على يد فرسان القريشات من سبيع كما هو

موضح بالقصة ،،، هديف بن عبود ما له اخو اسمه ناصر فلا تكذب على لحى الريجيل جعلك تبطي حي :)

اخوان هديف هم كالتالي / ذيب - معيض - محمد - جربوع - عايض - خالد - هذال - ذياب. من وين جبت (ناصر)؟؟

واذا انت تقصد (ناصر ابن فرج ابن سعد ابن فهيد ابن عبود) فحنا ربعه ونعرف كيف مات ياخوي اللامع :)

اخوي ناصر بن علي انا بعد لك شيوخ سبيع اللي خذوهم ربعي (ال مسعود) شيخ شيخ مع ابيات شعر كدليل قاطع بس ابيك تركز على هديف بن عبود اللي ماخذن اكثر من شيخ من شيخانكم وكنتو تحسبون له الف حساب ولا قدرتو فيه الا يوم عينتوه (منيع) وذبحتوه غدر اللي هو (هديف بن عبود) ولا فيه الا (هديف بن جعفر بن عبود) مافيه احد خذيتوه غيره اسمه هديف اخذ العلم اللي يجمد على الشارب ولا تكذب ترا الكذب عيب على الرجال!!!

شيخانكم اللي عندنا/

1- الشيخ/ محمد بن ضاري شيخ سبيع.. قتلوه ال روق

2- الشيخ/ فيحان بن باحص شيخ السودة.. قتله زيد بن شفلوت

3- الشيخ/ فيحان بن فيحان بن باحص... قتلوه الصقعات المساردة واللي حول به من فرسه (ورع من ورعان ال عبود ال فهد بن هادي ال عبود) وشافه المسردي يمشي في الحدبا على رجليه وذبحه.

4- الشيخ فهيد بن شويه شيخ العرينات.. قتله فهيد الفحيثه ال عاطف

5- الشيخ/ ابن جـفـران

6- الفارس/ هاجد بن سحمان بن عمير من افرس فرسان سبيع على الاطلاق خذوه ال عبود قضا في دم هديف بن عبود.

7- الفارس العقيد/ فايز بن هملان.. قتله عاطف بن مبارك بن سعيّد ال عاطف

8- الشيخ/ العماني السبيعي .. قتلوه بني هاجر

9- الشيخ/ هديهد السبيعي ... قتلوه بني هاجر

10- العقيد / محمس من عجمان الرخم ... قتلوه بني هاجر

12- الشيخ/ ابن قطنــان ..... قتله هديف بن عبود وسبق ان خذا هديف بن عبود اكثر من شيخ من ال قطنان والدليل رد القحاطين على ولد ابن قطنان اللي فرح بذبحة هديف (غدر) في وجيه القريشات لان هديف بن عبود سبق وذبح ابوه ابن قطنان (الشايب)/
ان كان تطري الشيخ ماذبح في نور_عود منيع ولاحمته العزايا
وصدوركم من ماضي افعاله حرور_كم طوحت يمناه شيخ النحايا
ابوك منهم في ثرا الحزم مدثور_عادك صغير مانبت لك ثنايا

تدرون وش معنى شيخ النحايا ياسبيع؟؟ يعني شيخ القبيله اللي عليه الكلام يعني (راس سنام القبيله) وهذا دليل على ان هديف ماخذن من روس الريجيل ومن كبار شيوخ سبيع وماردها في الصغار منهم :)

13- الشيخ/ مناحي بن وهطان شيخ الملوح.. قتله عايض (بن حركة) بن عبّود وقيل في مقتل مناحي بن وهطان المليحي/
خلوا مناحي في مداس الخيل****في ورد ربعن في اللقا شجعان

14-العقيد/ اباللحيم الصميلي..قتله كميّخ بن عبود

14- الشيخ/ عدلان الخويطري المحمدي.. قتلوه المساردة

15- الشيخ/ الوصيص المراغين... قتلوه المساردة

16ـ الشيخ الفارس فلحان السوده قتله راجح بن هلجان ال كعده ال عاطف

17- الشيخ الفارس/ فريج بن باحص من شيوخ السودة... قتله سالم بن ذفال ال الجرو

18- احد شيوخ السوده السبعان/ قتله سلطان بن عرار بن عبود او عايض بن حركه بن عبود وقيل في مقتله/
غاروا علينا جردة السبعان = يبغون من ذودي صبوح
يانافدا اللي ردوا الذيدان = عند العشاير يرخصون الروح
احتدهم عند السهل سلطان = ارتدهم شوق الطموح
جاك ابن حركه كنه السرحان = وأميرهم في دقلهم مطروح

19- الشيخ/ ابن فهيد احد عقداء الفراعنه سبيع ... قتلوه ال مسعود

20 -(( عدد 12)) فارس من سبيع جندلهم الشيخ/ عايض بن فهيد بن حركه وفي ذلك دليل من قصيدة الاكلبي الذي قال فيها/
جدّكـم عايـض المشهـور بالجاهليـة - إبن حركة مثل حد الرهيـف الحسامـي
يوم لحـق الغـزاة أفتـك ذوده لحالـه - وجندل أثنى عشر فارس ومن هج دامي
وصاح زيزومهم بالمنع تكفـى دخيلـك - وكب صهوة جواده وأنبطـح للسلامـي

وصاح زيزومهم بالمنع=فيحان بن فيحان بن باحص واللي قام بمنع بن باحص الفارس ناصر بن فرج ابن عبود الملقب (بالنادوق) وبعد المعركه طلب بن باحص خطبة بنت ال عبود لشجاعتهم ولان العرب من اول كلن منهم يقدر الثاني فزوجوه ال عبود لمعرفتهم بأن فيحان بن فيحان بن باحص شيخ وولد شيخ،،،وقيل في اسر ومنع فيحان بن فيحان بن باحص/
يانــفدا الـي ردهـم حـافـيـن****حتى النسيب مجرد(ن)عريـان
وقد اسر في نفس المعركه مسلّم بن جروه من عقداء وفرسان سبيع وقيل في اسره/
ياللي في مالهم مشفين ****تسلفو لمسلّم حذيان
وقتل في نفس المعركه مثل ماذكرت لكم 12 فارس من سبيع من اشهرهم العقيد اباللحيم الصميلي.

21- تسعين لحيه من السبعان اهل رنيه وثلاثة الجذعان ابناء محمد بن هندي بن حميد على بير عقلان وبرز في المعركه فعل جعفر بن عبود شيخ ال مسعود وفعل ضويحي شيخ ال الجرو وفعل عروان بن منيشط ال جاهل ال مسعود.

انا يعز علي اني استنقص من احد كل القبايل عندي كرام وحشوم ،،، ولا جات على السبعان فربع وعواني وسبيع عند القحاطين من دون بقية القبايل وانا ترا ما خلاني ارد الا بعد تبجح شاعركم ناصر الفريعني بقولة/

وركابة ال عبود ما منهم حي_تسعين لحيه قطعن اشلال

والمريض شاعركم اظهر الجهال اللي مثله وعلى شاكلته وخلاهم يمغمغون في الكلام وانا ماني باللي تلحقني في ربعي شكه ربعي لا جات على الدين فهم اهل الدين ولا جا الجهل فلا احد باجهل منهم وفعلنا مخبور وال مسعود قنو الابل والخيل كلها قلايع من جميع القبايل يوم بعض القبايل يربونها فحنا نعينها في المفلا وناخذها بالغصب بحد السيف يقول واحد من شيوخ النفعه عتيبه ال حجنه/

نبيك يا نجد فنجدت حلالنا_يا جعلها مره على ال مسعود

فرد عليه شيخ ال مسعود ذيب بن عبود/

نثلم بحد السيف دون ذيدانا_وذيدانكم ناطا بها الجلحود

ويوم بعض القبايل تحسب قلايعها فحنا يال مسعود ما حسبنا قلايعنا كل ذودنا وركابنا قلايع من القبايل الاخرى واولهم عتيبه وسبيع ويوم جا الاسلام وراح الجهل فكانا البل والحلال والخيل كلها فالبطنان والوديان وخلاناها تروح وتدج في الخلا لوجه الله دارين انها ماهيب لنا من الاول لانها كانت كسب بالغصب من ورى الخشم والحمد لله جا الاسلام والامن والامان ونحمد الله على العفو والعافيه يقول شاعرنا/

خيالة الشرفا رجال المواجيب_يا كم قزا في دقلهم من قلاعه

ويكفي قولة عايض بن فهيد بن عبود (بن حركه) رحمه الله/

ان دينوا فحنا هل التوحيـد_وان اشركوا فحنا هل الزلبات

ها ذلحين عوافي والله يلعن الشيطان وحطو على راس ابليس حيد .