نبدا بهذه القصيدة
يا مرحبا في ضيوف الخير والف هلا = وتحية كل من رام الهوى مـا قـواه
من روح روحي هلا والفين يا مسهلا = ما هلّ برقٍ سرى بالليل يوضي سناه
ينثر على وادي الهملان ليـن انتـلا = من جاريٍ طافح مثل العمايـم غثـاه
بوصالكم طارت الغبره وهمـي جـلا = اقفى وانا ارجي كريم الوجه يقلع مداه
يالله يـا كافـل المخلـوق رب عـلا = يا سامك السبع لا يطبق علينا سمـاه
بهداك ورضاك ترحمنـا بدفـع البـلا = من مدّّ حبل الرجا لا خيب الله رجـاه
ماناب اغبط الهبيل اللي بوقتـه سـلا = يتبع هوى النفس والشيطان يتبع هواه
دنيا زحف مرها لين اختلـط بالحـلا = ما سرّ به ضرّ والدنيا علـى منهـاه
ثم نذكر بعدها أشهر قصائد الشاعر ومن أشعاره المميزة
ياعنق ريم فريد وحـوش = توّه بسنّ الجهـل ناشـي
أقبل يدوش الضماير دوش = كنه يوطّي علـى جاشـي
وعيون نجل يهوشٍ هوش = دَهْشٍ وهو بالسِّكِر ماشي
يقود خيل الهوى وجيـوش = مهيب الاقـدار تنهاشـي
يازين لك ضامري مفروش = وارخص لك الروح ببلاشي
ياريحة العنبر المرشـوش = ياحصّـةٍ بيـد قمّـاشـي
ياليت حظي ينوشه نـوش = مثل المسجل على الماشي
عليه قلبي يديـره بـوش = حلِّه من العقل وانحاشـي
وهذه القصيدة يسنّدها على المرحوم (عبدالله العلي السناني)
جَرّيـت عشريـنٍ تتـالا وصبّيـت = صوتٍ يحطْم القلب من عبـرةٍ لـي
حَطْم الهشيم اللي على منبته ميـت = لاهزّتـه ريـح الهبايـب يهـلّـي
حَرقٍ تشيله هوج الاريـاح ويهيـت = من كثر ماشـاف الهوايـل وملّـي
غـدا مـزارٍ للهوا مِشِّتِـه بـيـت = يخجّهـا عـرضٍ ويظهـر معلّـي
ومخرّقِه مع كـل وجـهٍ مصاليـت = مايسْتَعَمْـل البـاب غِلَّـق وخِلّـي
ياتـلّ قلبـي تـلّ عَـزرِ بتمتيـت = تلّ الغصون اللـي ورقهـا مضلّـي
من يد غشيمٍ جاه في حيل عفريـت = والـى طشيـرِه بالخضيـرا معلّـي
غديت مقضـاة الهـوى وسْتذلّيـت = لاهوب عاذرني ولا سامحـن لـي
غصب علـي انقـاد لـه ماتبرّيـت = كله على شـان الحبيـب المسلّـي
اللـي ينبّـت حبّـه القلـب تنبيـت = باقصى الضماير رقعتن صابغٍ لـي
سيد البنات اللي يشيّع لـه الصّيـت = ايضا وانا من ضمنهـن سيـدٍ لـي
ياقصر وين اللي بك العـام مرّيـت = وين الحبيب اللي هروجه شفاً لـي
وانا على خبرك من العـام ماجيـت = لاعـاد يـومٍ ذكّـرن عشقـةٍ لـي
ياقصر من قـلّ التوافيـق خِلّيـت = مِخلٍن جوانبك الونَس عقـب خلّـي
وش فايده من عنوتي يـوم ردّيـت = أروح فـي عـزّي واعـوّد بذلّـي
مسموح ياحظّ النـدم لـو تزرّيـت = سقتن على نار الهوى حابـلٍ لـي
تحدّنـي لمـا وقـعـت وتبـرّيـت = وانا أحسب إنك ناصحَن صافطٍ لـي
ليت الحبيب يشوف حالـي وياليـت = إنـه يـزورن ساعـةٍ مِصْخرٍلـي
حيثي اطْبِع قلبي على الحبّ وبْليـت = وَتْلفت روحي والمصايب قضًا لـي
ماظن تبرى سطوتي لـو تداويـت = واللي يعرف يعالجن ماحِصـل لـي
واشن جرالي عقب ماشفت وشْفيت = مَرْض الحزين اللي ثمانـه دوًا لـي
لو ينعشـن رابـع شفايـاه قرّيـت = هو مانقص عمره وانا جايـزٍ لـي
يابو محمـد طـار عقلـي وفرّيـت = أشكي عليك الحـال يامسنـدٍ لـي
يابن السناني شفت وشْرفت ووْحيت = لاتذخر المجهود عـن غايـةٍ لـي
لاشكّ مايكتب علـى العبـد تثبيـت = يالعين هاتي من دموعـك وهلّـي
طعمي ومشروبي على الكبد حلتيـت = مع مرّهـا ومرورهـا مِعقـدٍ لـي
عزّ الله انـي مابِْريـت وتشافيـت = بالنقص يوم ان المصايـب تحلّـي
وصلوا على المعصوم ماطاف بالبيت = واعداد ماحبّ الحجر مـن مصلّـي
اللهم صل على محمد وآله وصحبه وسلم
ويتبع