[خيَّال الغلباء]

بسم الله الرحمن الرحيم

الله على اللي شوحتـه تقطـع الـدار=يوصل غريب الـدار ديـرة ربوعـه
أبيـه والله ميـر مغليـن الأسـعـار=والبنك ما أدلـه ولا أعـرف فروعـه
وذي حالـة الدنيـا لهـا أدوار وأدوار=يومـن تواصلنـا ويومـن قطوعـه
وكـل البشـر فيهـم فقـارا وتجـار=ونفوس تتحمـل والأخـرى جزوعـه
وحتى بنـوك النقـد تعجـز وتنهـار=ما هوب أنا عجزي بعـاد (ن) رموعـه
بس المهـم ودون توضيـح الأسـرار=وضعي ووضع الجيب شكله ونوعـه
شريت لي جيب (ن) عسى أبـوه للنـار=بانـت عذاريبـه مـن أول اسبوعـه
مزعج مع الصحراء ومزعج مع القار=ومـن يركبـه لازم يسكـر سموعـه
مثل الشبـح ما ينقصـه غيـر طيـار=شكلـه وتصميمـه وممشـاه روعـه
من خف دمـه ما بقـى فيـه مسمـار=ولا يركبـون عيـال الأنـذال نوعـه
ما يركبـون إلا سفـاري وفكـسـار=آخر زمان (ن) جعـل بقعـا تصوعـه
خلا رجـال المرجلـه مالهـم كـار=الذيـخ لـو يبكـي مسحنـا دموعـه
الذيـخ يشبـع فالفضايـل والأسـوار=والذيـب ما يـدرى بفقـره وجوعـه
وقت (ن) يخلي صاحي الفكـر يحتـار=ويشوف من هول الدهـر ما يروعـه
تلقى الفقير وفزعتـه خمسـة أنفـار=وتلقى الغني كـل الجماعـه فزوعـه
يا عاشق الدنيـا تـرى مالهـا جـار=كما واحد (ن) في حبها طـار شوعـه
اليوم تضحك لـه وتعطيـه الإنـذار=وبكـره تلحويهـا محانـي ضلوعـه
خلك علـى صكـات الأيـام صبـار=ويوم (ن) يفوتـك لا تمنـى رجوعـه
أقفى على ما فيه مـن خيـر وأشـرار=نجم (ن) هوى ما يندرى عـن طلوعـه
وما هي على كيفـك تمنـى وتختـار=أبعد على المخلوق مـن حـب كوعـه
يخبرك من ذاق المتاعـب والأمـرار=وحـاول ولا جالـه زمانـه بطوعـه
ومرت به الدنيا على بعض الأقطـار=في رحلة (ن) ما غيرت مـن طبوعـه
والله ما أواطـن عيشـة الـذل والعـار=مـا دام لـي شيمـه ونفـس قنوعـه
وقرش (ن) عزيز أفضل من ألفين دينار=من مصدر (ن) للذل يعلـن خضوعـه
ولو الوساده من صلافيـح الأحجـار=للراس أخير مـن التـرف والميوعـه

هذا والله يحفظكم ويرعاكم منقول مع خالص التحية وأطيب الأمنيات وأنتم سالمون وغانمون والسلام .