قصيده في الشيخ مطر بن ضيدان بن محمد ابوثنين وهو بلاشك يستاهل المدح واكثر اتمنى ان تنال اعجابكم
يـــــالله يامخرج من القـــــاع معدوم=ياربنا الوالي عليك اتكالي
عبــدك تحت هيبتك معطى ومحروم=يسجد لوجهك ياعظيــــــــم الجلالي
نسعى ولله سعينــــــــــــا دايم الدوم=ومن فضل ربـــــــي ماتقطع حبـالي
عندي على الشدات صملات وعزوم=اسوقها قــــــــــــدام من طول بالي
واليـــــــوم ياراع الوفاء جيتك اليوم=يالصاحب اللي صحبته راس مالي
تكفى يابوضيدان حدتنــــــــي اعلوم=عليـــــك يامفراص ماص الرجالي
وجيتك واناسيــفي من الجور مثلوم=وشكيت لك ياصاحبــــي ماجرالي
وانا ادري انك تسبح ابحور واتعوم=لاهابــــــــوا الرديان فاول وتالي
الحر الاشقرماوطى ماكر البوم=ولايخايــــل كــل ضــلعــن موالـــــي
يعيف ضعف النفس ويتوق ويشوم=ويرقى سنود ولايصيد الهزالي
وجاك الكتاب اللي مغلف ومختوم= وعليه من حبر القلم ماطرالي
بريح النفل والكاد والعود مشموم=واغلى العطور وماحوته التوالي
قدر الرجال مزبنه كل مضيوم=نطاحه القاله لياجاء مجالي
واخص حرآ لاطلع يبعد الحوم=طلعه تعدى نايفات الجبالي
قرمن لياجيته مقدر ومحشوم=في حضرته تنسى هموم الليالي
بالطيب له عادات وادروب واسلوم=في جرته يتعب ضريف العيالي
ياقوم يابعض الرياجيل ياقوم=وياقوم يامجدن مصيره زوالي
المجد للي زودوا غالي السوم=يابعد فرق الناس ياهم لالي
انتم شيوخ اسبيع نطاحه القوم=لاجاء لدخان الحرايب ضلالي
تامن بكم ذودن تهوم الوطى هوم=لاطوحوا بالصوت والدم سالي
ياما قصر من دونها كل شغموم=من ضرب ربعن يحتمون التوالي
ولوزدت انا بالمدح مانيب مليوم=تستاهلونه ياكرام السبالي
وتعيش ياذيب الرياجيل وتدوم= ويفداك من لايحتمل للثقالي